চাৰি পথ যুক্ত ৰাষ্ট্ৰীয় ঘাইপথ নিৰ্মাণৰ কাম সম্পূৰ্ণ নোহোৱাকৈয়ে চৰকাৰে নগাঁও জিলাৰ ৰহাত ৰাজপথেদি চলাচল কৰা যান- বাহনৰ পৰা কৰ সংগ্ৰহ কৰিবলৈ টোলগেটত চূন-তেল সানি সাজু কৰাক লৈ ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে।
কৃষক শ্ৰমিক উন্নয়ণ পৰিষদ নামৰ সংগঠনটোৱে ৰহাৰ টোলগেটত কৰ সংগ্ৰহৰ কাম আৰম্ভ নকৰিবলৈ চৰকাৰক দাবী জনোৱাৰ লগতে তাৰ বিপৰীতে তীব্ৰ আন্দোলনৰ কাৰ্যসূচী গ্ৰহণৰ ভাবুকি দিছে। সংগঠনটোৰ কেন্দ্ৰীয় সমিতিৰ সভাপতি মুকুল বৰা আৰু সাধাৰণ সম্পাদক উৎপল বৰুৱাই সংবাদ মাধ্যমক জনোৱা মতে চৰকাৰে এই টোলগেটটো পৰিচালনাৰ দায়িত্ব এটা বহি:ৰাজ্যৰ প্ৰতিষ্ঠানক দি টোলগেটটো মুকলি কৰিবৰ বাবে ষড়যন্ত্ৰত লিপ্ত হৈছে।
ৰাষ্ট্ৰীয় ঘাইপথ প্ৰাধিকৰণৰ দ্বাৰা ফ’ৰলেন যুক্ত ৩৭ নং ৰাষ্ট্ৰীয় ঘাইপথত নিৰ্মাণ কৰা এই টোলগেটটো মুকলি কৰি দিবৰ বাবে সময়ে সময়ে চৰকাৰে চেষ্টা চলাই আহিছে যদিও কৃষক মুক্তি সংগ্ৰাম সমিতি, কৃষক শ্ৰমিক উন্নয়ণ পৰিষদ আদি সংগঠনে প্ৰতিবাদ কৰাত এই কাৰ্যত সফল হোৱা নাছিল চৰকাৰ। কিন্তু শেহতীয়াকৈ পুনৰ এই টোলগেটটো মুকলি কৰাৰ প্ৰস্তুতি চলাইছে চৰকাৰে।
ইতিমধ্যে কৃষক শ্ৰমিক উন্নয়ণ পৰিষদে নগাঁও জিলাৰ উপায়ুক্তক এই সম্পৰ্কত এখন স্মাৰক-পত্ৰ প্ৰদান কৰিছে।কৃষক শ্ৰমিক উন্নয়ণ পৰিষদৰ নেতৃদ্বয়ে জনোৱা মতে ৰহাৰ ৰণথলীৰ টোলগেটেৰে উজনি- নামনিৰ পাহাৰীয়া জিলা কেইখনৰ লগতে বহি:ৰাজ্যলৈও দৈনিক শ-শ যান বাহন চলাচল কৰে। কিন্তু যাতায়াতৰ সকলো সুবিধা উপলব্ধ হ’ব পৰাকৈ ৰাষ্ট্ৰীয় ঘাইপথৰ অধিকাংশৰে নিৰ্মাণকাৰ্য আৰু অন্য সা-সুবিধা বৰ্তমানেও সম্পূৰ্ণ হোৱা নাই। বিশেষকৈ ৩৭ নং ৰাষ্ট্ৰীয় ঘাইপথৰ উৰিয়াগাঁৱৰ পৰা ৰঙাগড়া পৰ্যন্ত এই অংশৰ নিৰ্মাণকাৰ্য এতিয়াও সম্পূৰ্ণ হোৱা নাই।
অতি লেহেমীয়া গতিত চলা এই অংশৰ নিৰ্মাণকাৰ্য চলিত বৰ্ষত সম্পূৰ্ণ হোৱাৰ সম্ভাৱনা একেবাৰেই নাই।তদুপৰি ৰাষ্ট্ৰীয় ঘাইপথৰ নিৰ্মাণকাৰ্য সম্পূৰ্ণ হোৱা অংশতো বাৰিষা জমা হোৱা পানী উলিয়াই দিব পৰাকৈ কোনো নলা-নৰ্দমাৰ কাম বৰ্তমানেও সম্পূৰ্ণ হোৱা নাই। যাৰ ফলত উক্ত ৰাষ্ট্ৰীয় ঘাইপথটোত দুৰ্ঘটনা সংঘটিত হোৱাৰ আশংকা অধিক। সেয়েহে উক্ত টোলগেটটো মুকলি হ’লে ব্যাপক কৰৰ বোজা ৰাইজে মূৰ পাতি ল’বলগীয়া হ’ব। টোলগেটটোৰে পাৰ হোৱা প্ৰত্যেকখন অত্যাৱশ্যকীয় সামগ্ৰী কঢ়িওৱা যান-বাহনে অত্যধিক কৰ আদায় দিবলগীয়া হ’লে অত্যাৱশ্যকীয় সামগ্ৰীৰ মূল্যবৃদ্ধিৰ আশংকা আছে।
সংগঠনটোৰ নেতাদ্বয়ে এই প্ৰসংগত কয়— ‘আমি জিলা উপায়ুক্তৰ জৰিয়তে টোলগেটটো মুকলি নকৰিবলৈ চৰকাৰক আহ্বান জনাইছো।অন্যথা কৃষক শ্ৰমিক উন্নয়ণ পৰিষদে তাৰ বিৰুদ্ধে ৰাইজৰ সহযোগত জংগী আন্দোলন গঢ়ি তুলিব।
