ৰাম মন্দিৰত সংঘটিত চুৰি কাৰ্যৰ তদন্তৰ বাবে গঠিত বিশেষ তদন্তকাৰী দলৰ প্ৰতিবেদনৰ ভিত্তিত অযোধ্যাৰ ৰাম মন্দিৰৰ দান হিচাপে লাভ কৰা কোটি কোটি টকা আৰু সোণ আত্মসাৎ কৰাৰ অভিযোগত বৃহস্পতিবাৰে নিশা আৰক্ষীয়ে আঠগৰাকী লোকক গ্ৰেপ্তাৰ কৰিছে। এই গ্ৰেপ্তাৰৰ পাছতেই ‘শ্ৰীৰাম জন্মভূমি তীৰ্থক্ষেত্ৰ ট্ৰাষ্ট‘ৰ সাধাৰণ সম্পাদক চম্পত ৰায় আৰু অন্যতম সদস্য অনিল মিশ্ৰই পদত্যাগ কৰাৰ লগে লগে সমগ্ৰ ঘটনাকেন্দ্ৰিক ৰহস্য অধিক ঘনীভূত হৈ পৰিছে। এই বৃহৎ কেলেংকাৰী পোহৰলৈ অহাৰ পাছতে বিৰোধী দলসমূহে প্ৰকৃত দোষীক সুৰক্ষা প্ৰদান কৰাৰ অভিযোগ উত্থাপন কৰি উচ্চতম ন্যায়ালয়ৰ নিৰীক্ষণত তদন্তৰ দাবী জনাইছে।
তদন্তকাৰী দলে দাখিল কৰা প্ৰাথমিক প্ৰতিবেদনৰ পৰামৰ্শ অনুসৰি বৃহস্পতিবাৰে ট্ৰাষ্টৰ অন্যতম সদস্য কৃষ্ণ মোহনে আৰক্ষীৰ ওচৰত আনুষ্ঠানিকভাৱে এজাহাৰ দাখিল কৰে। ইয়াৰ ভিত্তিত আৰক্ষীয়ে ধন আৰু সামগ্ৰী গণনাৰ সৈতে জড়িত ৰামশংকৰ যাদৱ ওৰফে টিণ্ণু, ৰমাশংকৰ মিশ্ৰ ওৰফে ৰবি মিশ্ৰ, অনুকল্প মিশ্ৰ, লৱকুশ মিশ্ৰ, অবিনাশ শুক্লা, মণীশ যাদৱ, সুভাষ শ্ৰীবাস্তৱ আৰু কৰুণেশ পাণ্ডেক গ্ৰেপ্তাৰ কৰে। আৰক্ষীৰ সূত্ৰই প্ৰকাশ কৰা অনুসৰি অভিযুক্তসকলৰ কেইবাজনৰো ঠিকনাৰ পৰা প্ৰায় ৮০ লাখ টকাৰ হিচাপ বহিৰ্ভূত ধন উদ্ধাৰ কৰা হৈছে।
সংবাদ মাধ্যমত প্ৰকাশিত প্ৰতিবেদন অনুসৰি, গ্ৰেপ্তাৰ হোৱা অভিযুক্তসকলৰ একাংশৰ সৈতে সদ্য পদত্যাগী ট্ৰাষ্টীদ্বয়ৰ প্ৰত্যক্ষ যোগাযোগ থকাৰ তথ্য পোহৰলৈ আহিছে। পদত্যাগী সাধাৰণ সম্পাদক চম্পত ৰায়ৰ প্ৰাক্তন বাহন চালক তথা বিশ্ব হিন্দু পৰিষদৰ কৰসেৱকপুৰমৰ সৈতে জড়িত ৰামশংকৰ যাদৱৰ হাতত দান বাকচৰ চাবি থকাৰ লগতে স্বেচ্ছাচাৰীভাৱে কাম কৰাৰ অভিযোগ উত্থাপন হৈছে, অৱশ্যে তেওঁ এই অভিযোগ অস্বীকাৰ কৰিছে। আনহাতে, ধন গণনাৰ দায়িত্বত থকা ৰমাশংকৰ মিশ্ৰ আৰু চিচিটিভিৰ নিৰীক্ষণত বাধা দিয়াৰ অভিযোগত অভিযুক্ত তেওঁৰ পুত্ৰ অনুকল্প মিশ্ৰ হৈছে পদত্যাগী সদস্য অনিল মিশ্ৰৰ আত্মীয়। ৰমাশংকৰৰ জোঁৱায়েক লৱকুশ মিশ্ৰক চুৰি হোৱা ধন আৰু সোণ বাহিৰলৈ পঠিওৱাৰ দায়িত্ব দিয়া হৈছিল।
ইয়াৰ লগতে প্ৰভাৱশালী কৰ্মচাৰী তথা এই চক্ৰটোৰ গুৰুত্বপূৰ্ণ সদস্য বুলি অভিহিত অবিনাশ শুক্লাৰ পৰা আৰক্ষীয়ে পাঁচ লাখ টকা উদ্ধাৰ কৰিছে। দানপাত্ৰৰ নিৰীক্ষণৰ দায়িত্বত থকা ৰামশংকৰ যাদৱৰ ভতিজাক মণীশ যাদৱৰ ঘৰৰ পৰাও চুৰি হোৱা ধন উদ্ধাৰ কৰা হৈছে। আন দুগৰাকী অভিযুক্তৰ ভিতৰত প্ৰাক্তন বেংক কৰ্মচাৰী সুভাষ শ্ৰীবাস্তৱে ধন গণনা আৰু বেংকত জমা দিয়াৰ দায়িত্ব পালন কৰাৰ বিপৰীতে কৰুণেশ পাণ্ডেৰ বিৰুদ্ধে ভক্তক ৰচিদ প্ৰদান কৰাত অনিয়ম কৰাৰ অভিযোগ উত্থাপন হৈছে।
এই সমগ্ৰ ঘটনাক লৈ বিৰোধী দল কংগ্ৰেছ, সমাজবাদী পাৰ্টি আৰু শিৱসেনাই (উদ্ধৱ) তীব্ৰ প্ৰতিক্ৰিয়া প্ৰকাশ কৰিছে। শিৱসেনাৰ নেতা সঞ্জয় ৰাউতে শুকুৰবাৰে অভিযোগ কৰে যে তেওঁলোকৰ দলে দান কৰা চাৰি কিলোগ্ৰাম ওজনৰ ৰূপৰ ইটা আৰু দলপতি উদ্ধৱ ঠাকৰেই দান কৰা এক কোটি টকাৰ কোনো ৰচিদ আজিলৈকে লাভ কৰা নাই। তেওঁ লগতে ৰাম মন্দিৰৰ পৰা চুৰি হোৱা দুই হাজাৰ কোটি টকাৰে তৃণমূল আৰু শিৱসেনাৰ (উদ্ধৱ) সাংসদ ক্ৰয় কৰাৰো গুৰুতৰ অভিযোগ উত্থাপন কৰিছে। কংগ্ৰেছ দলে অভিযোগ কৰিছে যে যিটো ট্ৰাষ্টৰ বিৰুদ্ধে ধন আত্মসাৎ কৰাৰ অভিযোগ উত্থাপন হৈছে, সেই একেই ট্ৰাষ্টৰ এজাহাৰৰ ভিত্তিত তদন্ত হ‘লে প্ৰকৃত অপৰাধী সাৰি যোৱাৰ সম্ভাৱনা আছে। সেয়েহে দলটোৱে উচ্চতম ন্যায়ালয়ৰ নিৰীক্ষণত সমগ্ৰ ঘটনাৰ তদন্ত দাবী কৰাৰ লগতে প্ৰধানমন্ত্ৰীৰ কাৰ্যালয়ৰ প্ৰাক্তন বিষয়া তথা ৰাম মন্দিৰ নিৰ্মাণ সমিতিৰ অধ্যক্ষ নৃপেন্দ্ৰ মিশ্ৰৰ লগতে ট্ৰাষ্টৰ অন্যান্য বিষয়ববীয়াসকলৰ বিৰুদ্ধেও তদন্তৰ দাবী জনাইছে।
