আৰক্ষী আৰু সেনাবাহিনীৰ এক যুটীয়া অভিযানত শুকুৰবাৰে নিশা বোকাজান মহকুমাৰ খটখটি আৰক্ষী থানাৰ অন্তৰ্গত অসম-নাগালেণ্ড সীমান্তৰ লাহৰিজানত পিষ্টলসহ এন ডি এফ বিৰ এজন কেডাৰ আৰু এজন লিংকমেনক আটক কৰা হয়।
প্ৰাপ্ত তথ্য মতে, লাহৰিজানৰ শিৱম ৰাইচ হোটেলত আটক কৰা এন ডি এফ বি কেডাৰ গৰাকীক ডিলাইৰ হিতেশ্বৰ তুলচীয়াৰী বড়ো গাঁৱৰ প্ৰয়াত নবল স্বৰ্গীয়াৰীৰ পুত্ৰ দীপক স্বৰ্গয়াৰী (৩০) আৰু লিংকমেনজনক হোজাইৰ লনকান বৰ্মণ গাঁৱৰ প্ৰয়াত কিটানত চন্দ্ৰ ঘোষৰ পুত্ৰ সুমিত ঘোষ (২৮) বুলি চিনাক্ত কৰা হৈছে।
দুয়োজনৰ পৰা অভিযানকাৰী দলটোৱে ৰাছিয়াত নিৰ্মিত এটা .২২ পিষ্টল, ৭ ৰাউণ্ড সক্ৰিয় গুলী আৰু ডিফুৰ নিবাসী ৰঞ্জিত ঠাকুৰৰ নামত এন ডি এফ বি (স)ৰ ধনদাবী পত্ৰ উদ্ধাৰ কৰে। আৰক্ষীৰ জেৰাত দীপক স্বৰ্গীয়াৰীয়ে বৰলাংফেৰৰ প্ৰদীপ ৰাভাই তেওঁক ধনদাবী পত্ৰসমূহ যোগান ধৰিছিল বুলি স্বীকাৰ কৰে৷
আনহাতে ডিলাই আৰক্ষী আৰু সেনাৰ এটি দলে ডিলাইত থকা স্বৰ্গীয়াৰীৰ বাসগৃহত অভিযান চলাই কোনো নাম লিপিবদ্ধ নথকা এন ডি এফ বি (স)ৰ এখন ২০ লাখ টকীয়া ধনদাবী পত্ৰ আৰু সংগঠনটোৰ ৩ খন উকা ধনদাবী পত্ৰ উদ্ধাৰ কৰে।
তদুপৰি বৰলাংফেৰ আৰক্ষী আৰু সেনাৰ আন এটি দলে বৰলাংফেৰৰ প্ৰদীপ ৰাভাৰ ঘৰত অভিযান চলাবলৈ গৈছিল যদিও ঘৰত কোনো লোক নথকাত অভিযানকাৰী দলটোৱে কাকো আটক কৰিবলৈ সক্ষম নহল বুলি জানিব পৰা গৈছে।
খটখটি আৰক্ষীয়ে জানিবলৈ দিয়া মতে ঘটনা সম্পৰ্কত ইতিমধ্যে ধৃত দীপক স্বৰ্গীয়াৰী আৰু সুমিত ঘোষৰ বিৰুদ্ধে খটখটি আৰক্ষী থানাত এক গোচৰ ৰুজু কৰি অধিক তথ্যৰ বাবে জেৰা অব্যাহত ৰখা হৈছে।