ৰাজ্যৰ বিদ্যুৎ খণ্ডটোৰ বিতৰণ ব্যৱস্থাটো সম্পূৰ্ণভাৱে ব্যক্তিগতকৰণৰ উদ্দেশ্য আগত ৰাখি ইয়াৰ প্ৰথম পদক্ষেপ হিচাপে চৰকাৰে অসম শক্তি বিতৰণ কোম্পানীৰ অধীনস্থ ১৭টা মণ্ডলৰ ৪৭টা উপ-আস্থান (sub-station) ব্যক্তিগতকৰণৰ প্ৰক্ৰিয়া আৰম্ভ কৰিছে। চৰকাৰৰ এই ষড়যন্ত্ৰ তথা এনে হঠকাৰী সিদ্ধান্তৰ বিৰুদ্ধে আছাম ষ্টেইট পাৱাৰ য়ুনিয়নে অহা ৪ মে’ত সমগ্ৰ অসমজুৰি দুঘণ্টাজোৰা ধৰ্ণা কাৰ্যসূচী হাতত লৈছে।
য়ুনিয়নে চৰকাৰৰ এই ষড়যন্ত্ৰৰ বিৰুদ্ধে আপোচবিহীন সংগ্ৰামৰ বাবে সমগ্ৰ বিদ্যুৎকৰ্মীক অংগীকাৰবদ্ধ হ’বলৈ আৰু উক্ত কাৰ্যসূচী সফল কৰাৰ বাবে আহ্বান জনাইছে। য়ুনিয়নৰ ব্ৰজেন বৰি আৰু সাধাৰণ সম্পাদক দীনেশ চন্দ্ৰ গোস্বামীয়ে জানিবলৈ দিয়া মতে, এই প্ৰতিবাদী কাৰ্যসূচী পুৱা ১০ বজাত শাখাসমূহৰ সুবিধা অনুযায়ী সংমণ্ডল, মণ্ডল ভিত্তিত পালন কৰা হ’ব।
মঙলবাৰে সংবাদ মাধ্যমলৈ প্ৰেৰণ কৰা এটা বিবৃতিযোগে য়ুনিয়নৰ সভাপতি আৰু সম্পাদকে এই কথা জানিবলৈ দিছে।
উল্লেখযোগ্য যে চৰকাৰে সমগ্ৰ অসমৰ ৪৭টা ৩৩/১১ কে ভি মানৱ চলিত, মানৱবিহীন বিদ্যুৎ উপ-আস্থান ব্যক্তিগতকৰণৰ বাবে নিবিদা আহ্বান কৰিছিল। অসম শক্তি বিতৰণ কোম্পানীৰ মহাপ্ৰবন্ধক (মুখ্য কাৰ্যালয়)ৰ জৰিয়তে আহ্বান কৰা এই নিবিদা সম্পৰ্কত অহা ৪ মে’ তাৰিখে সিদ্ধান্ত লোৱা হ’ব।
য়ুনিয়নে চৰকাৰৰ এনে হঠকাৰী সিদ্ধান্ত কাৰ্য্যকৰী কৰাৰ পৰা বিৰত থকাৰ বাবে চৰকাৰ আৰু বিদ্যুৎ কৰ্তৃপক্ষক দাবী জনোৱাৰ লগতে নৱনিযুক্ত ৰাজ্যিক শক্তি মন্ত্ৰী আৰু মুখ্য মন্ত্ৰীকো বিষয়টোত তৎকালে হস্তক্ষেপ কৰি শ্ৰমিক তথা ৰাইজ বিৰোধী এই ব্যৱস্থা বাতিলৰ বাবে আহ্বান জনায়।
এই প্ৰধান দাবীৰ লগতে য়ুনিয়নে উপযুক্ত আৰু উন্নত আন্তঃগাঁথনিৰে অস্থায়ী কৰ্মীসকলক তৎকালে স্থায়ীকৰণৰ দ্বাৰা বিভাগীয়ভাৱে উপ-আস্থানসমূহৰ লগতে বিতৰণ, উৎপাদন আৰু প্ৰৱহন ব্যৱস্থা শক্তিশালী কৰি তুলিবলৈ আহ্বান জনাইছে। নেতাদ্বয়ে কয় যে এই ক্ষেত্ৰত উৰিষ্যা আৰু দিল্লীৰ অভিজ্ঞতা আমি মনত ৰখা ভাল।
