অসম ৰাজ্যভাষা আইন, ১৯৬০ৰ দফাবোৰ সৰ্বস্তৰত বলৱৎ কৰিবৰ বাবে চৰকাৰক দুমান সময় ধৰি দিলে সাহিত্য সভাই। আজি অসম সাহিত্য সভাৰ ভাগৱতীপ্ৰসাদ বৰুৱা ভৱনত এখন সংবাদমেল দি সাহিত্যসভাৰ নেতৃবৰ্গই এই কথা সংবাদ মাধ্যমক জানিবলৈ দিয়ে।
যোৱা ২১ জুলাইত ডিফুৰ আৱৰ্ত ভৱনত অনুষ্ঠিত সভাৰ দ্বিতীয়খন পূৰ্ণাংগ কাৰ্য্য নিৰ্বাহকত লোৱা প্ৰস্তাৱসমূহ সংবাদ মাধ্যমক জনাবলৈ এই সংবাদমেলখন দিয়া হৈছিল। পূৰ্ণাংগ কাৰ্য্য নিৰ্বাহকত মুঠ ১৫টা প্ৰস্তাৱ লোৱা হৈছিল।
সংবাদমেলত সাহিত্য সভাৰ নেতৃবৰ্গই জনোৱামতে, ডিফুৰ কাৰ্য্য নিৰ্বাহকত কেইবাটাও গুৰুত্বপূৰ্ণ প্ৰস্তাৱ লোৱা হয়। ইয়াৰ ভিতৰত ৰাজ্যভাষা অসমীয়াক সৰ্বস্তৰত বলৱৎ কৰাৰ বাবে চৰকাৰক হেঁচা দিয়াটো অন্যতম।
সভাত অসম চৰকাৰক এই আইনখন সৰ্বস্তৰত বলৱৎ কৰাৰ বাবে দুমাহ সময় বান্ধি দিয়াৰ লগতে চৰকাৰৰ সকলো বিভাগৰ বিষয়াসকলক সকীয়াই দিয়ে যে ২২ ছেপ্তেম্বৰ ২০১৮ তাৰিখৰ পৰা কেন্দ্ৰীয় চৰকাৰলৈ প্ৰেৰণ কৰিব লগীয়া নথি-পত্ৰৰ বাহিৰে অন্য নথি, চিঠি-পত্ৰ আদিত ৰাজ্যভাষা আইন অনুসৰি ভাষা ব্যৱহাৰ নহ’লে সভাই কঠোৰ ব্যৱস্থা গ্ৰহণ কৰিব।
ইয়াৰ লগতে, সেই তাৰিখৰ পাছৰ পৰা বিভাগীয় চিঠি-পত্ৰ, নথি আদি ব্ৰহ্মপুত্ৰ উপত্যকাত অসমীয়া ভাষাত লিখিত নহ’লে গ্ৰহণ কৰিবলৈ অস্বীকাৰ কৰিবলৈ সকলো দল, ব্যক্তি, সংগঠন, অনুষ্ঠান-প্ৰতিষ্ঠানক আহ্বান জনাইছে সাহিত্য সভাই।
আনহাতে সভাই এটা গুৰুত্বপূৰ্ণ প্ৰস্তাৱ লৈ চৰকাৰক অসম চৰকাৰৰ পদসমূহত নিযুক্তিৰ বাবে পতা পৰীক্ষাত ৫০ নম্বৰৰ চৰকাৰী ভাষা আৰু ৫০ নম্বৰৰ মাতৃভাষা বিষয়ক প্ৰশ্ন থকা এখন কাকত বাধ্যতামূলক কৰিবলৈ দাবী জনাইছে।
আন এটা প্ৰস্তাৱত ৰাষ্ট্ৰীয় ঘাইপথ প্ৰাধিকাৰীৰ দ্বাৰা ৰাষ্ট্ৰীয় ঘাইপথবোৰত লগোৱা ইংৰাজী আৰু অসমীয়া ভাষাৰ নামফলকবোৰত ঠাইৰ নাম বিকৃত কৰা হৈছে। এইবোৰ অনতিপলমে শুধৰাবলৈ দাবী জনায়।
তাৰোপৰি, অসম চৰকাৰে চাহ বাগিচাৰ এলেকাত চাব বাগানক কেন্দ্ৰ কৰি থকা আদিবাসীসকলৰ বাবে স্থাপন কৰিব খোজা চৰকাৰী বিদ্যালয়ৰ মাধ্যম অসমীয়া কৰিবলৈ চাহ জনগোষ্ঠী-আদিবাসী ভাষা-সাহিত্য-সংস্কৃতি বিকাশ উপ-সমিতিয়ে জনোৱা দাবীৰ বাবে উপ-সমিতিখনক অসম সাহিত্য সভাই ধন্যবাদ জনাইছে। লগতে চৰকাৰক এই বিদ্যালয়সমূহৰ মাধ্যম অসমীয়া কৰিবলৈ দাবী জনাইছে।
এইকেইটা গুৰুত্বপূৰ্ণ প্ৰস্তাৱৰ উপৰি সদ্য প্ৰয়াত বিশিষ্ট নাট্যকাৰ শুক্ৰাচাৰ্য্য ৰাভাৰ নামত শুক্ৰাচাৰ্য্য ৰাভা বঁটা আৰু মুক্তি যুঁজাৰু, লেখক, প্ৰাক্তন বিধায়ক প্ৰয়াত গৌৰীশংকৰ ভট্টাচাৰ্য্যৰ নামত এটা বঁটা প্ৰচলনৰ প্ৰস্তাৱ লোৱা হয়। গৌৰীশংকৰ ভট্টাচাৰ্য্যৰ নামত প্ৰচলন হ’ব লগীয়া বঁটাটো দুবছৰৰ মূৰে মূৰে এজন শ্ৰেষ্ঠ বিধায়কক দিয়া হ’ব বুলি জানিবলৈ দিয়ে।
আনহাতে তেজপুৰত অসম সাহিত্য সভাৰ প্ৰথমজন সভাপতি তথা সাহিত্যিক পদ্মনাথ গোহাঞি বৰুৱাৰ নামত এটা জাতীয় অভিলেখাগাৰ স্থাপনৰো সিদ্ধান্ত লৈছে সাহিত্য সভাই।
