আজি বহাগৰ প্রথমটো বুধবাৰ। অসমৰ অন্যতম বৃহৎ জনগোষ্ঠী দেউৰীসকলে আজিৰ দিনটোতে উদযাপন কৰে তেওঁলোকৰ বসন্ত উৎসৱ বা বিহু ইবাঁকু বিচু । মাজুলীতো আজি এই বিচু উপলক্ষে মাজৰ দেউৰী, বালি দেউৰী, শ্রীৰাম দেউৰী গাওঁ আদি স্থানত অতি উলহ-মালহেৰে বিচু বা বিহু উদযাপন কৰিছে।
ঘৰৰ মুৰব্বীজনে পৰিয়ালৰ মৃতকসকলৰ পিণ্ড দান কৰাৰ অন্তত ইজনে সিজনৰ ঘৰলৈ গৈ বিচুৰ শুভেচ্ছা জনাই পৰম্পৰাগত কাজি আৰু চুঁজে খোৱাৰ পৰ্ব আৰম্ভ কৰে। মহিলা সকলে কণী যুঁজ খেলাৰ উপৰি বোকা খেলত ভাগ লয়।
আজিৰ দিনটোতে দেউৰী সকলে চুৰিয়া পিন্ধোৱা নামৰ এক অনুষ্ঠানো পালন কৰে। পৰম্পৰা অনুসৰি যৌৱনৰ দুৱাৰডলিত ভৰি দিয়া তেৰ-চৈধ্য বছৰীয়া ল’ৰাক চুৰিয়া পিন্ধোৱা হয়। চুৰিয়া পিন্ধোৱা সকলক আজিৰ দিনটোৰ পৰাই ডেকা হিচাপে স্বীকৃতি দিয়ে।
বিচুত অংশ লোৱা লোকসকলে দেওঘৰৰ পৰা ওলাই আহি গাঁৱৰ মুখিয়ালজনৰ ঘৰত বিচু বা বিহু মাৰে। ইয়াৰ পিছত গাঁওখনৰ পূবৰ পৰা পশ্চিমলৈ প্রতিঘৰতে বিচু মাৰি গাঁৱৰ মূৰৰ মুকলি পথাৰত বিহুৰ বিদায় জনায়।
বিচুত দেউৰী সকলে দুৰুম, ককিলি, দেনটৌ, টকামাৰি, তাল আদি বাদ্যযন্ত্র ব্যবহাৰ কৰে। আৱৰব, হুৰাই, ৰাঙলী, লহৰীয়া, চিলাম-চিলাম, অটু চাপৰি, দেমা আদি নৃ্ত্য প্রদৰ্শন কৰে। মাজুলীৰ বৰ্ণাঢ্য সংস্কৃতিৰ অন্যতম আকৰ দেউৰী সকলৰ লোকসংস্কৃতিৰ অন্যতম অংগ বিচুৰ আনন্দই মাজুলীৰ আকাশ বতাহ ৰঙীন কৰি তুলিছে।
