বড়ো সাহিত্যত পোন প্ৰথম গল্প আৰু উপন্যাস সৃষ্টি কৰা তথা বড়ো ভাষাত ৬০ খনতকৈও অধিক উপন্যাস প্ৰকাশ কৰা সাহিত্যিক চিত্তৰঞ্জন মুছাহাৰীৰ (৭০) আদ্য শ্ৰাদ্ধ আজি তেওঁৰ জন্ম গাঁৱত সম্পন্ন হয়। বহুদিন ধৰি দুৰাৰোগ্যত আক্ৰান্ত হৈ যোৱা ১৬ জানুৱাৰীৰ নিশা নিজ বাসগৃহত শেষ নিশ্বাস ত্যাগ কৰিছিল এই সাহিত্যিক গৰাকীয়ে।
কোকৰাঝাৰ জিলাৰ আফ্লাগাঁৱৰ অন্টাইগুড়ী গাঁৱৰ নিজ গৃহত আজি পুৱাৰ পৰাই দিন জোৰা কাৰ্য্যসূচীৰে স্বৰ্গীয় চিত্তৰঞ্জন মুছাহাৰীৰ আদ্য শ্ৰাদ্ধ সম্পন্ন কৰা হয়। কাৰ্য্যসূচী অনুসৰি পুৱা স্বৰ্গীয় চিত্তৰঞ্জন মুছাহাৰীৰ প্ৰতিচ্ছবিত তেওঁৰ সহধৰ্মিনী ভাৰতী মুছাহাৰীয়ে মাল্যাৰ্পণ কৰি শ্ৰদ্ধাঞ্জলি জনায়। ইয়াৰ পিছতে বি টি চিৰ কাৰ্যবাহী সদস্য ৰাজীৱ কুমাৰ ব্ৰহ্ম, বড়ো সাহিত্য সভাৰ সভাপতি তৰেন বড়ো প্ৰমুখ্যে আত্মীয় সকলে শ্ৰদ্ধাঞ্জলি অৰ্পন কৰে।
শ্ৰদ্ধাঞ্জলি অনুষ্ঠানত বি টি চিৰ কাৰ্যবাহী সদস্য ৰাজীৱ কুমাৰ ব্ৰহ্মই সাহিত্যিক গৰাকীৰ অকাল মৃত্যুত শোক প্ৰকাশ কৰি কয় যে সাহিত্যিক গৰাকীৰ অকাল বিয়োগে বড়ো সাহিত্যৰ বাবে এক অপূৰণীয় ক্ষতি। লগতে সাহিত্যিক গৰাকীৰ নামত প্ৰতিমূৰ্তি নিৰ্মাণ কৰিব বুলিও সংবাদ মাধ্যমৰ আগত প্ৰকাশ কৰে।
আনহাতে শ্ৰদ্ধাঞ্জলি অনুষ্ঠানত বড়ো সাহিত্য সভাৰ সভাপতি তৰেন বড়োৱে কয় যে চিত্তৰঞ্জন মুছাহাৰীয়ে সচাকৈ বড়োৰ এগৰাকী শ্ৰেষ্ঠ সাহিত্যিক আছিল। তেওঁ বড়ো সাহিত্যত ৬০ খনতকৈও অধিক উপন্যাস সৃষ্টি কৰি বড়ো সাহিত্যৰ ভৰাল টনকিয়াল কৰি থৈ গৈছে।। সাহিত্যিক চিত্তৰঞ্জন মুছাহাৰীক ইতিমধ্যে বড়ো সাহিত্য সভাই “বড়ো উপন্যাসৰ সম্ৰাট” উপাধি প্ৰদান কৰা হোৱা বুলিও কয়।
অন্টাইগুড়ী গাওঁত ১৯৪৪ চনৰ ১৫ আগষ্টত জন্ম লাভ কৰি ১৬-১-২০১৮ তাৰিখত মৃত্যু হোৱা সাহিত্যিকৰ ৰচিত উপন্যাস কেইখন মান ক্ৰমে ‘জুজাইনি অৰ’, ‘বিখায়া গাৱৌ খুগায়া গেৱা’, ‘ফৈমাল মিজিং’ ইত্যাদি। উল্লেখযোগ্য য়ে বড়ো সাহিত্যৰ এগৰাকী শ্ৰেষ্ঠ সাহিত্যিক চিত্তৰঞ্জন মুছাহাৰীক বিটিচি প্ৰশাসনৰ পৰা যোৱা ২০১৪ চনত ‘প্ৰমোদ চন্দ্ৰ ব্ৰহ্ম সাহিত্য বঁটা’ আৰু বড়ো সাহিত্য সভাৰ তৰফৰ পৰা ‘শ্বমেস্বৰী সাহিত্য বঁটা” প্ৰদান কৰিছিল।