মুখ্যমন্ত্ৰী সৰ্বানন্দ সোণোৱাল আজি গৃহ সমষ্টি মাজুলী ভ্ৰমণলৈ আহিব। মুখ্যমন্ত্ৰীগৰাকীয়ে পোনে পোনে মাজুলীৰ সমস্যা জৰ্জৰিত শালমৰা অঞ্চলত হেলিকপ্টাৰেৰে অৱতৰণ কৰি দুপৰীয়া এখন বিশেষ সভাত অংশ ল’ব।
আজিৰে পৰা দুদিনীয়া কাৰ্যসূচীৰে মাজুলীৰ শালমৰাত আৰম্ভ হোৱা সদৌ অসম কুমাৰ যুৱ ছাত্ৰ সন্মিলনীৰ ৰাজ্যিক অধিৱেশনৰ দ্বিতীয় দিনাৰ মুকলি অধিৱেশনত মুখ্যমন্ত্ৰী সোণোৱালে মুখ্য অতিথি হিচাপে ভাষণ প্ৰদান কৰিব।
মাজুলীৰ অতি পিছপৰা, গৰাখহনীয়া, বান দুৰ্গত, গৃহহাৰা ৰাইজৰ মাজলৈ মুখ্যমন্ত্ৰীৰ প্ৰথমবাৰৰ ভ্ৰমণৰ বাতৰিয়ে শালমৰাবাসীক উৎকণ্ঠিত কৰি ৰাখিছে। তেওঁলোকে সমস্যাসমূহ মুখ্যমন্ত্ৰীগৰাকীয়ে ক্ষেত্ৰভিত্তিক দৰ্শন কৰি বাস্তৱসন্মত সমাধানৰ দিশত আগবঢ়াই নিব বুলি আশাৰে বাট চাইছে।
মুখ্যমন্ত্ৰীৰ ভ্ৰমণক লৈ শালমৰাত ৰাইজ আৰু প্ৰশাসনৰ মাজত ব্যাপক প্ৰস্তুতি চলিছে। সকলো ধৰণৰ নিৰাপত্তা নিশ্চিত কৰাৰ কাৰণে প্ৰতিকূল বতৰকো নেওচি প্ৰশাসন উঠি পৰি লাগিছে।
আনহাতে, মুখ্যমন্ত্ৰী অহা হেলিকপ্টাৰ অৱতৰণৰ সুবিধাৰ্থে শালমৰাত অস্থায়ী হেলিপেড নিৰ্মাণ কৰিছে বুলি প্ৰশাসনৰ সূত্ৰৰ পৰা জানিব পৰা গৈছে।