যোৱা কেইদিনমান ধৰি ২০ মে’ত লামডিঙৰ বিহু মঞ্চত জুবিনে পৰিৱেশন কৰিব লগীয়া সংগীতানুষ্ঠানক লৈ বহু বিতৰ্কৰ সৃষ্টি হৈছিল যদিও আজি জনপ্ৰিয় শিল্পীগৰাকী লামডিঙলৈ যোৱাটো নিশ্চিত কৰিছে শিল্পীগৰাকীয়ে। জুবিনক কেন্দ্ৰ কৰি দুষ্কৃতিকাৰী বা কোনো দুষ্টচক্ৰই যাতে অঞ্চলটোত কোনো ধৰণৰ অপ্ৰীতিকৰ পৰিস্থিতিৰ সৃষ্টি কৰিব নোৱাৰে তাৰ বাবে প্ৰশাসনে অভূতপূৰ্ব নিৰাপত্তাৰ ব্যৱস্থা কৰিছে।
ডাঙৰ মন্ত্ৰী আহিলে কৰাৰ দৰে এই নিৰাপত্তা ব্যৱস্থাত বৃহৎ সংখ্যক নিৰাপত্তা বাহিনীৰ জোৱানক অন্তৰ্ভুক্ত কৰা হৈছে। এটা বিশেষ সূত্ৰৰ তথ্য মতে লামডিঙৰ এই অনুষ্ঠানটোৰ বাবে আজি প্ৰায় ৭০০ আৰক্ষী আৰু অৰ্ধ-সামৰিক জোৱানক নিয়োগ কৰা হৈছে।
উল্লেখযোগ্য যে কেইদিন মানৰ পূৰ্বে Lumding United নামৰ এটা ফেইচবুক পেইজৰ পৰা জুবিনক লামডিঙৰ বিহু উৎসৱলৈ নাযাবলৈ সকীয়নি দিয়া হৈছিল। লগতে তেওঁৰ অনুষ্ঠান বৰ্জন কৰিবলৈ আহ্বানো জনোৱা হৈছিল।
এই সকীয়নিৰ অন্তৰালত জুবিনে যোৱা কেইবা খনো বিহুমঞ্চত তথা ছ’চিয়েল মিডিয়াৰ যোগেদিও নাগৰিকত্ব সংশোধনী বিধেয়কৰ স্পষ্ট বিৰোধিতা কৰি অহাটোৱেই কাৰণ বুলি বিভিন্নজনে ক’ব খোজে।
আনহাতে জুবিনক ৰাজনীতিৰ পৰা আঁতৰি থাকিবলৈ আহ্বান জনাইছিল হোজাইৰ বিধায়ক শিলাদিত্য দেবেও। তেওঁ জুবিনক ৰাজনৈতিক মন্তব্য কৰাৰ পৰা বিৰত থাকি কেৱল গান গাই যাবলৈ আহ্বান জনাইছিল।
মন কৰিব লগীয়া যে লামডিং হিন্দু বাঙালীসকলৰ প্ৰাধান্য থকা অঞ্চল। হিন্দু বাংলাদেশীক নাগৰিকত্ব দিব খুজি কেন্দ্ৰীয় চৰকাৰে আনিব খোজা নাগৰিকত্ব সংশোধনী বিধেয়কখনৰ সমগ্ৰ অসমীয়া মানুহৰ লগতে জুবিনে স্পষ্ট বিৰোধিতা কৰাত, স্বাভাৱিকতে খৰ্গহস্ত হৈ পৰিছিল কিছু সংখ্যক হিন্দু বাঙালী লোক।
কিন্তু সকলো হিন্দু বাঙালী লোকৰ পৰিৱৰ্তে এটা অংশহে তথা এটা দুষ্ট চক্ৰহে জুবিনৰ বিৰুদ্ধে এই ষড়যন্ত্ৰত জড়িত বুলি কোৱাৰ লগতে জুবিন গাৰ্গৰ সমৰ্থনত লামডিঙৰ নাগৰিক সমাজে ১৫ মে’ত এখন নাগৰিক সভা পাতিছিল।
সভাখনত জুবিনৰ বিৰুদ্ধে অপপ্ৰচাৰ চলোৱাসকলক গৰিহণা দিয়াৰ লগতে কোনো কাৰণতে জুবিনক অপমান কৰিবলৈ দিয়া নহয় আৰু জুবিনে অনুষ্ঠান পৰিৱেশন কৰিবই বুলি দাবী কৰিছিল।
আজি লামডিং আৰক্ষীৰ এটা সূত্ৰই কয় যে যিকোনো ধৰণৰ আইন-শৃংখলাজনিত পৰিস্থিতিৰ মোকাবিলা কৰিবলৈ নিৰাপত্তা ব্যৱস্থা কটকটীয়া কৰি তোলা হৈছে।
উল্লেখযোগ্য যে আজি কেইবা বছৰ পূৰ্বেও আলফাই জুবিনক ভাবুকি দিয়াৰ পিছতে তদানীন্তন অসম চৰকাৰে শিল্পীজনক ব্যক্তিগত নিৰাপত্তাৰক্ষী দিছিল।
