অসমৰ খিলঞ্জীয়া জনগণৰ অস্তিত্ব ৰক্ষাৰ একমাত্ৰ দলিল স্বৰূপ এনআৰচিৰ দ্বিতীয়খন খচৰা প্ৰকাশ পাব অহা ৩০ জুনত। কিন্তু ইয়াৰ পূৰ্বে নিৰাপত্তাৰ বিষয়টোৱে চাপত ৰাখিছে ৰাজ্য চৰকাৰক৷ ইতিমধ্যে জিলা পর্যায়ত নিৰাপত্তা বিষয়টো পর্যালোচনা কৰিবলৈ মুখ্য সচিব আৰু ডিজিপিৰ নেতৃত্বত উচচ পর্যায়ৰ দলে কেইবাখনো জিলা ভ্রমণ কৰিছে৷
উজনি অসমৰ কেইখনমান জিলাক বাদ দি ৰাজ্যৰ অধিক সংখ্যক জিলাকেই স্পর্শকাতৰ হিচাপে চিনাক্ত কৰি নিৰাপত্তা ব্যৱস্থা কটকটীয়া কৰাৰ প্রাথমিক পদক্ষেপ ইতিমধ্যে গ্রহণ কৰিছে প্ৰশাসনে৷ এনআৰচি সন্দৰ্ভত চোৰাংচোৱাৰ প্রতিবেদন লাভৰ পাছত অসম আৰক্ষীয়ে তিনিতৰপীয়া নিৰাপত্তা ব্যৱস্থাৰ ওপৰত গুৰুত্ব আৰোপ কৰিছে৷
অতি স্পর্শকাতৰ, স্পর্শকাতৰ আৰু সাধাৰণ স্পর্শকাতৰ হিচাপে এলেকাসমূহ ইতিমধ্যে চিনাক্ত কৰা হৈছে৷ নিৰাপত্তাজনিত কাৰণতে সংশ্লিষ্ট জিলা আৰু এলেকাসমূহৰ নাম আৰক্ষী প্রশাসনে ৰাজহুৱা কৰা নাই৷ জানিব পৰা মতে অতি স্পর্শকাতৰ এলেকাসমূহত অধিক নিৰাপত্তা বাহিনী নিয়োগ কৰা হ’ব৷ প্রতিটো এনআৰচি সেৱা কেন্দ্রত তালিকা প্রকাশৰ এসপ্তাহমান পূর্বৰ পৰা নিৰাপত্তাৰক্ষী নিয়োগ কৰি চোকা দৃষ্টি ৰখা হ’ব বুলি প্ৰকাশ কৰিছে প্ৰশাসনৰ এটি শীৰ্ষ সূত্ৰই ৷
ইতিমধ্যে প্রতিখন জিলাত কিমান সংখ্যক নিৰাপত্তাৰক্ষীৰ প্রয়োজন, সেয়া জিলা আৰক্ষী অধীক্ষকসকলক নির্ণয় কৰিবলৈ অসম আৰক্ষীৰ মুখ্য কার্যালয়ৰ পৰা নির্দেশ দিয়া হৈছে৷ যিবোৰ স্থানত অধিক সংখ্যক বিদেশীৰ নাম এনআৰচিৰ তালিকাৰ পৰা বাদ পৰি যোৱাৰ সম্ভাৱনা আছে, তেনেবোৰ স্থানকে অতি স্পর্শকাতৰ হিচাপে চিনাক্ত কৰা হৈছে৷
উল্লেখযোগ্য যে এনআৰচিৰ দ্বিতীয়খন খচৰা তালিকা প্রকাশৰ লগে লগে অসমত আইন-শৃংখলাৰ অৱনতি ঘটিব পাৰে বুলি চোৰাংচোৱা সংস্থাই সকীয়াই দিয়াৰ পাছতে কেন্দ্রীয় গৃহ মন্ত্র্যালয়েও বিষয়টো গুৰুত্ব সহকাৰে লৈছে৷ কেন্দ্রীয় গৃহমন্ত্রী ৰাজনাথ সিঙৰ অধ্যক্ষতাত এই সন্দর্ভত পর্যালোচনা বৈঠক অনুষ্ঠিত হৈছে৷
ৰাজ্যৰ যিবোৰ ঠাইত মৌলবাদী শক্তিৰ গতিবিধি ধৰা পৰিছে বা জেহাদী কার্যকলাপ চলিছিল, সেই অঞ্চলবোৰৰ উপৰি অসম-বাংলা সীমান্তকো অতি স্পর্শকাতৰ এলেকা হিচাপে লৈ কঠোৰ নিৰাপত্তা ব্যৱস্থা গ্ৰহণ কৰিবলৈ চোৰাংচোৱাই কেন্দ্র- ৰাজ্য চৰকাৰক পৰামর্শ আগবঢ়াইছে৷ কেন্দ্রীয় অর্ধসামৰিক বাহিনী, সেনাৰ নিয়োগ আৰু টহলৰ উপৰি প্রতিখন থানা আৰু আৰক্ষী চকীত অতিৰিক্ত আৰক্ষী জোৱান নিয়োগ কৰা হ’ব বুলিও জানিব পৰা গৈছে৷