‘অসমত অবৈধ বাংলাদেশী নাগৰিকে এন আৰ চিত নাম অন্তৰ্ভুক্ত কৰিবলৈ অহৰহ চেষ্টা অব্যাহত ৰাখিছে। কোনো অবৈধ বাংলাদেশী নাগৰিকৰ নাম যাতে এন আৰ চিত সোমাব নোৱাৰে, তাৰ বাবে এন আৰ চিত জড়িত থকা জিলাৰ উপায়ুক্ত, আৰক্ষী অধীক্ষক তথা বিষয়া-কৰ্মচাৰীসকল সজাগ হৈ থাকিব লাগিব’। সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্য ই টিহু আঞ্চলিক ছাত্ৰ সন্থাৰ কাৰ্যালয়ত সাংবাদিকৰ আগত এনেদৰে কয়।
আছুৰ শীৰ্ষ নেতাগৰাকীয়ে লগতে কয় যে এন আৰ চিৰ জৰিয়তে জাতীয় দায়িত্ব পালন কৰি থকা বিষয়া-কৰ্মচাৰীসকলৰ ওপৰতে নিৰ্ভৰ অসমৰ খিলঞ্জীয়া মানুহৰ সুৰক্ষিত ভৱিষ্যৎ। তেওঁ লগতে কয় অবৈধ বাংলাদেশী নাগৰিকৰ নামমুক্ত এন আৰ চি হ’ব অসমৰ খিলঞ্জীয়া মানুহৰ বাবে ৰক্ষাকৱচ।
আনহাতে মুখ্য উপদেষ্টাগৰাকীয়ে ৰাজ্যখনৰ খিলঞ্জীয়া লোকৰ সাংবিধানিক আৰু অৰ্থনৈতিক ৰক্ষাকৱচ দাবী কৰি ভাৰতৰ প্ৰধান মন্ত্ৰীক অসমৰ খিলঞ্জীয়া লোকৰ মন কী বাত শুনি অসমৰ জ্বলন্ত সমস্যাসমূহ সমাধান কৰিবলৈ আহ্বান জনায়।
আনহাতে ভট্টাচাৰ্যক সাংবাদিকে বি টি চিৰ ভূমি নীতি সন্দৰ্ভত সোধা এক প্ৰশ্নৰ উত্তৰত তেওঁ কয় যে বি টি এ ডিৰ খিলঞ্জীয়া লোকৰ ভূমিকে ধৰি সকলো স্বাৰ্থ সুৰক্ষিত হৈ থাকিব লাগিব বুলি মত পোষণ কৰে।
ইয়াৰ উপৰি বিধানসভাৰ অধ্যক্ষৰ উদ্যোগত সকলো ৰাজনৈতিক দলৰ প্ৰতিনিধি আৰু শিক্ষক সংগঠনৰ মাজত শৈক্ষিক দিশৰ ওপৰত হোৱা আলোচনাৰ নতুন পদক্ষেপকো আদৰণি জনাই উপদেষ্টা ভট্টাচাৰ্যই।
