২০১৬ চনত বিধানসভাৰ নিৰ্বাচনত তথাকথিত পৰিৱৰ্তনৰ শ্ল’গানেৰে শাসনভাৰ গ্ৰহণ কৰা বিজেপি নেতৃত্বাধীন চৰকাৰখনে দুবছৰ অতিক্ৰম কৰাৰ পিছতো বিধায়ক ভাস্কৰ শৰ্মাৰ নিজা সমষ্টি মাৰ্ঘেৰিটাৰ যাতায়াতৰ প্ৰাণকেন্দ্ৰস্বৰূপ ৩৮ নং ৰাষ্ট্ৰীয় ঘাইপথৰ জৰাজীৰ্ণ অৱস্থাই স্থানীয় ৰাইজক জ্বলাকলা খুৱাইছে।
ফলত আজি মাৰ্ঘেৰিটা আঞ্চলিক ছাত্ৰ সন্থাই এক প্ৰেছ বিবৃতি যোগে বিধায়ক ভাস্কৰ শৰ্মাক দাবী জনাই কয় যে, ‘আগন্তুক এমাহৰ ভিতৰত মাৰ্ঘেৰিটা সমষ্টিৰ ৰাষ্ট্ৰীয় ঘাইপথৰ সমস্যা সমাধান কৰক অন্যথা মাৰ্ঘেৰিটা ৰাইজৰ ওচৰত এই পথ মেৰামতি কৰিব নোৱাৰাৰ বাবে ক্ষমা বিচাৰক।
লগতে মাৰ্ঘেৰিটা আঞ্চলিক ছাত্ৰ সন্থাই এই বিবৃতি যোগে অঞ্চলটোৰ এই জৰাৰ্জীণ ৰাষ্ট্ৰীয় ঘাইপথৰ সংক্ৰান্তত বিধানসভাত মাত মাতিব নোৱাৰাটোৱে বিধায়ক ভাস্কৰ শৰ্মাৰ নিজৰ সমষ্টিটোৰ বিকাশ আৰু আন্তঃগাঁথনি উন্নয়নৰ বাবে অলপো যে দায়বদ্ধ নহয় তাকে প্ৰমাণিত কৰিছে বুলি কয়।
উল্লেখযোগ্য যে তিনিচুকীয়া জিলাৰ অন্তৰ্গত মাৰ্ঘেৰিটাৰ মহকুমাৰ চহৰৰ মাজেদি পাৰ হৈ যোৱা ৩৮ নং ৰাষ্ট্ৰীয় ঘাইপথৰ জৰাজীৰ্ণ অৱস্থাই জনসাধাৰণক জলা-কলা খুৱাইছে। সাধাৰণ পথচাৰীৰ পৰা আৰম্ভ কৰি ৰোগী, স্কুলীয়া ছাত্ৰ-ছাত্ৰী, দুচকীয়-তিনিচকীয়া বাহনত যাতায়াত কৰা যাত্ৰীসকলে প্ৰতিদিনে বিভিন্ন সমস্যাৰ সন্মুখীন হ’ব লগীয়া হৈছে।
ইতিমধ্যে এই জৰাজীৰ্ণ ৰাষ্ট্ৰীয় ঘাইপথটি নতুনকৈ নিৰ্মাণ কৰাৰ দাবীত আছু, অসম জাতীয়তাবাদী যুৱ-ছাত্ৰ পৰিষদ, ছাত্ৰ মুক্তি সংগ্ৰাম সমিতি আদি দল-সংগঠনে কেতবোৰ প্ৰতিবাদী কাৰ্য্যসূচী ৰূপায়ণ কৰি আহিছে যদিও চৰকাৰ-প্ৰশাসনে বৰ্তমানলৈকে কোনো ধৰণৰ পদক্ষেপ গ্ৰহণ কৰা নাই।
ফলত আজি অনতিপলমে মাৰ্ঘেৰিটাৰ লগতে অসমৰ আন আন অঞ্চলৰ ৰাষ্ট্ৰীয় ঘাইপথ সমূহ নিৰ্মাণ কৰিবলৈ দাবী জনাইছে সদৌ অসম ছাত্ৰ সন্থাৰ মাৰ্ঘেৰিটা আঞ্চলিক সমিতিয়ে ৷ অন্যথা তীব্ৰ গণতান্ত্ৰিক আন্দোলন গঢ়ি তুলিব বুলি হুংকাৰ দিয়ে।
