কাজিৰঙাৰ ৰাষ্ট্ৰীয় উদ্যানৰ এটা গুৰুত্বপূৰ্ণ এনিমেল কৰিডৰ কাঞ্চনজুৰিৰ ৩৭ নং ৰাষ্ট্ৰীয় ঘাইপথত ১৭ এপ্ৰিলত সংঘটিত এক পথ দুৰ্ঘটনাত নিহত হোৱা জয়কান্ত পেগুৰ বাসগৃহত আজি বিয়লি আহি উপস্থিত হয় বন মন্ত্ৰী প্ৰমিলাৰাণী ব্ৰহ্ম।
বোকাখাতৰ ২ নং আৰ্দশ বালিজান মিচিং গাওঁৰ বাসিন্দা নিহত জয়কান্তৰ বিধবা পত্নী দিপালী পেগুৰ লগতে শোকসন্তপ্ত পৰিয়ালক লগ কৰি বনমন্ত্ৰী প্ৰমিলাৰাণী ব্ৰহ্মই গৃহৰক্ষী জোৱানজনৰ মৃত্যুত গভীৰ শোক প্ৰকাশ কৰি সমবেদনা জ্ঞাপন কৰাৰ লগতে মৃত পেগুৰ পৰিবাৰক নিজা ববীয়াকৈ নগদ ৫০ হেজাৰ টকা তথা বিশ্ব প্ৰকৃতি নিধিৰ তৰফৰ পৰা দিয়া ৩ লাখ টকাৰ একালীন সাহাৰ্য্যৰ অনুমোদন পত্ৰ প্ৰদান কৰে।
ইয়াৰোপৰি নগাওঁ জিলা প্ৰশাসনৰ তৰফৰ পৰাও জয়কান্ত পেগুৰ পৰিয়াললৈ ২ লাখ টকাৰ একালীন সাহাৰ্য দিয়া বুলি মন্ত্ৰী গৰাকীয়ে ঘোষণা কৰে ৷
মৃতকৰ পৰিয়াল আৰু সদৌ অসম ট্ৰাইবেল সংঘৰ বোকাখাত গোটৰ তৰফৰ পৰা মন্ত্ৰী গৰাকীক নিহত জয়কান্ত পেগুৰ পৰিয়ালৰ এজন সদস্যক কৰ্ম সংস্থাপন দিবৰ বাবে আবেদন জনায় পত্ৰ প্ৰদান কৰা হয় ৷ তেওঁ কৰ্ম সংস্থাপনৰ বিষয়টো গুৰুত্ব সহকাৰে বিবেচনা কৰা হব বুলি পৰিয়ালটোক আশ্বাস দিয়ে ৷
মন্ত্ৰী গৰাকীৰ সৈতে বনবিভাগৰ উচ্চ পদস্থ বিষয়া, কাজিৰঙাৰ কৰ্তৃপক্ষ আৰু বোকাখাতৰ মহকুমাধিপতিও উপস্থিত আছিল।
উল্লেখযোগ্য যে যোৱা ১৭ এপ্ৰিলত কাঞ্চনজুৰিত পথৰ কাষত কৰ্মৰত অৱস্থাতে বনকৰ্মী বাদশ্বাহ আলী আৰু গৃহৰক্ষী জোৱান জয়কান্ত পেগুক এখন বাহনে মহতিয়াই থৈ গৈছিল। দূৰ্ঘটনাত গুৰুত্বৰ ভাৱে আহত জয়কান্ত পেগুয়ে ২২ এপ্ৰিলত চিকিৎসাধীন অৱস্থাতে গুৱাহাটী চিকিৎসা মহাবিদ্যালয়ত মৃত্যুক সৱতি লয়।
পেগুৰ পৰিয়ালৰ সদস্যই চিকিৎসাত অৱহেলা হোৱাৰ বাবে লোকজনৰ মৃত্যু হ’বলগীয়া হয় বুলি বন মন্ত্ৰীৰ সমুখত ক্ষোভ প্ৰকাশ কৰে ৷ মৃত্যুৰ সময়ত গৃহৰক্ষী জোৱানজনে পৰিবাৰ দিপালী পেগুৰ লগতে তিনি গৰাকী কন্যা আৰু এটি পুত্ৰ সন্তানক এৰি থৈ যায় ৷
