বনৰীয়া হাতীৰ পালে ঘৰ ভাঙি থাকোতেই ঘৰৰ ভিতৰত আবদ্ধ হৈ পৰা এটা পৰিয়ালক গাওঁবাসী আৰু বনকৰ্মীয়ে তৎপৰতাৰে কোনোমতে ৰক্ষা কৰিবলৈ সক্ষম হয় পশ্চিম কাৰ্বি আংলঙৰ খেৰনি অঞ্চলত। জানিব পৰা মতে পৰিয়ালটোত শিশুসহ মুঠ সাতজন সদস্য আছিল। হাতীয়ে ঘৰটো ভাঙি থাকোতেই তেওঁলোকে চিঞৰ-বাখৰ কৰাত ওচৰৰ মানুহ আহি হাতী খেদি তেওঁলোকক উদ্ধাৰ কৰে। যোৱা নিশা ২ নম্বৰ ৱাটিজুৰ গাৱঁৰ মনমোহন সিঙৰ পৰিয়ালটোৱে এই দুৰ্য্যোগটোৰ সন্মুখীন হোৱা বুলি জানিব পাৰ গৈছে।
এটা সূত্ৰই জনোৱা মতে, যোৱা পোন্ধৰ দিন ধৰি বনৰীয়া হাতীৰ এটা পালে কাৰ্বি পাহাৰৰ পশ্চিম কাৰ্বি আংলঙৰ খেৰনি আৰু ইয়াৰ দাঁতিকাষৰীয়া অঞ্চলত ক্ৰমাগতভাৱে উপদ্ৰৱ চলাই আছে। ক’ৰবাত যদি বনৰীয়া হাতীয়ে মানুহৰ ঘৰ ভাঙিছে, আন ক’ৰবাত আকৌ ভঁৰালৰ ধান খাইছে, ক’ৰবাত কৃষকৰ খেতিৰ ফচল ধ্বংস কৰিছে। মুঠতে পশ্চিম কাৰ্বি আংলঙৰ খেৰনি বনাঞ্চলিক কাৰ্য্যালয়ৰ অন্তৰ্গত বৃহত্তৰ খেৰনি, হাজাগাফাৰ, ৱাটিজুৰ, মাইলু আদি অঞ্চলত বিগত পোন্ধৰ দিন ধৰি এটা বৃহৎ হাতীৰ পালে উপদ্ৰৱ চলাই সৰ্বসাধাৰণৰ চকুৰ টোপনি হৰিছে।
গাওঁবাসীয়ে জনোৱা মতে বনৰীয়া হাতীয়ে বিগত নিশাবোৰত ধাৰাবাহিকভাৱে হাজাগাফাৰ গাওঁৰ নিবাসী ৰাজেশ্বৰ সিং, ৰামচন্দ্ৰ চৌহান, ডাংবানন্দ নাপেনছা, পৰিমল দিব্ৰাৰ লগতে ২ নম্বৰ ৱাটিজুৰ গাওঁৰ দিলীপ সিং, মনমোহন সিং আৰু ফৰেষ্ট বজাৰৰ অতুল মালাকাৰকে ধৰি বহু লোকৰ ঘৰ-দুৱাৰ ভাঙি লণ্ডভণ্ড কৰাৰ লগতে ভঁৰালৰ ধান খাই তহিলং কৰে। বহু লোকৰ বাৰীৰ কলগছ-তামোলগছ, অন্য খেতিৰ ফচল আদি গচকি-ভাঙিও ধ্বংস কৰিছে।
এক কথাত কবলৈ গ’লে বনৰীয়া হাতীৰ উপদ্ৰৱে উল্লেখিত অঞ্চলবোৰৰ ৰাইজক জ্বলা-কলা দেখুৱাইছে। ফলত নিশা হ’লেই শংকিত হৈ পৰে অঞ্চলবাসী। জানিব পৰামতে যোৱা নিশাৰ ঘটনাটোত ৫০-৬০ টা থকা বনৰীয়া হাতীৰ পালে সমগ্ৰ ঘৰটোকে আগুৰি ধৰি লণ্ডভণ্ড কৰে।
