অৰ্জুন বঁটা বিজয়ী ৰাজ্যৰ প্ৰবীণ এথলীট ভোগেশ্বৰ বৰুৱা বৃক্কৰ ৰোগত আক্ৰান্ত হৈ মহানগৰীৰ হায়াট হস্পিতালত চিকিৎসাধীন হ’বলগীয়া হৈছে।
প্ৰাপ্ত তথ্য মতে যোৱা কালি অৰ্থাৎ বুধবাৰে গুৰুতৰভাৱে অসুস্থ অৱস্থাত তেওঁক চিকিৎসালয়খনত ভৰ্তি কৰোৱা হয়।
হায়াট হস্পিতালৰ মহাপ্ৰবন্ধক পৰাগজ্যোতি দত্তই জনোৱা মতে বৃক্কৰ ৰোগত গুৰুতৰভাৱে অসুস্থ হৈ পৰা অৰ্জুন ভোগেশ্বৰ বৰুৱাক বুধবাৰে সন্ধিয়া প্ৰায় ৭ বজাত হস্পিতালখনৰ ইউৰ’লজি বিভাগত ভৰ্তি কৰোৱা হয়।
হস্পিতালখনৰ ইউৰ’লজি বিভাগৰ জ্যেষ্ঠ চিকিৎসক ডাঃ অম্লানজ্যোতি শৰ্মাৰ অধীনত তেওঁক চিকিৎসা প্ৰদান কৰি থকা হৈছে বুলি জানিব পৰা গৈছে।
উল্লেখযোগ্য যে অৰ্জুন বঁটাৰে সন্মানিত প্ৰথমজন অসমীয়া ভোগেশ্বৰ বৰুৱাই ১৯৬৬ চনৰ বেংককত অনুষ্ঠিত এচিয়ান গেমছত ৮০০ মিটাৰ দৌৰত সোণৰ পদক অৰ্জন কৰি অভিলেখ স্থাপন কৰিছিল।
