চি বি আয়ে গ্ৰেপ্তাৰ কৰা গুৱাহাটীৰ আয়কৰ বিষয়া তিনিগৰাকী আৰু কৰ পৰামৰ্শদাতাজনৰ জামিন আবেদন নাকচ কৰি আজি ২১ এপ্ৰিলত গুৱাহাটীৰ চি বি আই ( CBI ) বিশেষ আদালতে তেওঁলোকক ১৪ দিনৰ ন্যায়িক জিম্মালৈ প্ৰেৰণ কৰিছে।
৫০ লাখ টকাৰ ঘোচ দিয়াৰ চেষ্টা কৰোঁতে যোৱা ১৩ এপ্ৰিলত নতুন দিল্লীত চি বি আয়ে গুৱাহাটীৰ আয়কৰ আয়ুক্ত শ্বেতাভ সুমনক গ্ৰেপ্তাৰ কৰিছিল। গোচৰটো সন্দৰ্ভত আয়ুক্তগৰাকীৰ লগতে গ্ৰেপ্তাৰ কৰা অধিবক্তা তথা কৰ পৰামৰ্শদাতা ৰমেশ গোৱেংকা, কৰ বিষয়া প্ৰতাপ দাস আৰু প্ৰাঞ্জল শৰ্মাৰ জামিন আবেদনো নাকচ হয়।
১৩ এপ্ৰিলৰ পৰা ১৭ এপ্ৰিললৈ আৰু তাৰ পিছত ১৭ৰ পৰা যোৱা ২০ এপ্ৰিললৈকে গ্ৰেপ্তাৰ হোৱা লোককেইজনক চি বি আইৰ জিম্মাত দিয়া হৈছিল।
কৰৰ পৰা হাত সৰাৰ বাবে এই চক্ৰ চলাই থকা দুজন আয়কৰ বিষয়া, দুজন কৰ পৰামৰ্শদাতা আৰু এখন ব্যক্তিগত ফাৰ্মৰ মালিকক তদন্তকাৰী সংস্থাটোৱে গ্ৰেপ্তাৰ কৰিছিল।
এখন এজাহাৰৰ ভিত্তিত গুৱাহাটী, যোৰহাট, নগাওঁ, শ্বিলং, নইদা, নতুন দিল্লী আৰু নজৰত থকা ফাৰ্মখনৰ লগত সংযোগ থকা কিছুমান ঠাইত চি বি আয়ে তালাচী চলাইছিল।
তালাচীৰ সময়ত জব্দ কৰা কিছুমান নথি সংস্থাটোৱে বৰ্তমান পৰীক্ষা কৰি আছে। অভিযুক্ত কৰ বিষয়াজনক দিবলে অনা ৪০ লাখ টকাও এজন মধ্যভোগীৰ পৰা চি বি আয়ে জব্দ কৰিছিল।