অসমৰ চলচ্চিত্ৰ জগতলৈ এক সুখবৰ কঢ়িয়াই আনিছে অসমৰ এজন পৰিচালকে। স্কটলেণ্ডৰ এডিনবাৰ্গ বিশ্ববিদ্যালয়ত চলচ্চিত্ৰ সম্পৰ্কে অধ্যয়নৰ বাবে বাছনি হৈছে অসমৰ ছবি পৰিচালক পাৰ্থজিৎ বৰুৱা । পাৰ্থজিৎ বৰুৱাৰ সৈতে ভাৰতৰ আন এঘাৰগৰাকী ছবি পৰিচালকো উক্ত বিশ্ববিদ্যালয়খনলৈ অধ্যয়ন কৰাৰ বাবে যাব।
নগাঁও চহৰৰ আমোলাপট্টি নিৱাসী পাৰ্থজিৎ বৰুৱাই ইতিমধ্যে বহুটো বঁটা লাভ কৰি ৰাষ্ট্ৰীয় পৰ্যায়ত অসমৰ মান উজলাবলৈ সক্ষম হৈছে।
উল্লেখ্য যে ১৯২৬ চনৰ পৰা ১৯২৯ চনৰ সময়ছোৱাত ৰূপকোঁৱৰ জ্যোতি প্ৰসাদ আগৰৱালাই এডিনবাৰ্গ বিশ্ববিদ্যালয়ত কৰা অধ্যয়নৰ সমল বিচাৰি পাৰ্থজিৎ বৰুৱাই অহা ২৫ মাৰ্চত স্কটলেণ্ডলৈ ৰাওনা হ’ব।
দেশৰ প্ৰায় ২০০ গৰাকী পৰিচালকৰ মাজৰ পৰা ভাৰত চৰকাৰৰ নেশ্যনেল ফিল্ম আৰ্কাইভ অৱ ইণ্ডিয়া নামৰ বিভাগটোৱে এই ১২ জন ছবি পৰিচালকক বাছনি কৰি উলিয়াইছে।
অসমৰ পৰিচালকজনে ইতিপূৰ্বে লক্ষ্মী ওৰাং ৰাইজিং ফৰ্ম দা গ্ৰেভ(২০১৫), দা ধেমাজী ট্ৰেজেডী(২০১৫), ৰীমা পাঙি(২০১৫), নগাঁও এ লেণ্ড অৱ ডাইভাৰছিটী(২০১৭) আদি ছবিৰ বাবে আঞ্চলিক আৰু ৰাষ্ট্ৰীয় পৰ্যায়ত কেইবাটাও বঁটা লাভ কৰিবলৈ সক্ষম হৈছে।
ইয়াৰ উপৰি বম্বে আন্তঃৰাষ্ট্ৰীয় ছবি মহোৎসৱ আৰু উত্তৰ-পূব ছবি মহোৎসৱত শ্ৰেষ্ঠ পৰিচালকৰ বঁটা, দিল্লী আন্তঃৰাষ্ট্ৰীয় ছবি মহোৎসৱ আৰু কলিকতা আন্তঃৰাষ্ট্ৰীয় ছবি মহোৎসৱত শ্ৰেষ্ঠ সমালোচকৰ বঁটাও লাভ কৰিছিল।
আনহাতে দুখন সমালোচনামূলক গ্ৰন্থ ৰচনা কৰা বৰুৱাই ২০১৬ চনত লণ্ডনৰ এছিয়া হাউছত অসমীয়া চিনেমাৰ ওপৰত বক্তব্যও ৰাখিছিল।
অসমীয়া ছবি জগতৰ জন্মদাতা জ্যোতি প্ৰসাদ আগৰৱালাই ১৯২৬ চনৰ পৰা ১৯২৯ চনলৈ স্কটলেণ্ডত কৰা অধ্যয়নৰ বিষয়ে অসমবাসীক অৱগত কৰাটোৱে প্ৰধান লক্ষ্য বুলি পাৰ্থজিৎ বৰুৱাই সংবাদ মাধ্যমক জানিবলৈ দিয়ে।
