ধুবুৰীত প্ৰধান মন্ত্ৰী আৱাস যোজনা আঁচনিৰ হিতাধীকাৰী নিৰ্বাচিত কৰাত ব্যাপক কেলেংকাৰি সংঘটিত হোৱাৰ অভিযোগ তুলি আজি অনুসূচিত জাতি-জনজাতি নিবনুৱা সন্থাৰ ধুবুৰী জিলা সমিতিয়ে এক ৩ঘণ্টীয়া ধৰ্ণা কাৰ্যসূচী ৰূপায়ণ কৰে।
পুৱা ১১ বজাত ধুবুৰী উপায়ুক্ত কাৰ্যালয়ৰ সন্মুখত আৰম্ভ হোৱা এই ধৰ্ণা কাৰ্যসূচীত সন্থাৰ নেতৃত্বত গৌৰীপুৰ সমষ্টিৰ অন্তৰ্গত দেবিতোলা উন্নয়ন খণ্ডৰ অধীনৰ আশাৰীকান্দি গাঁৱৰ শতাধিক ৰাইজে দুৰ্নীতিপৰায়ণ পঞ্চায়ত সচিব প্ৰান কৃষ্ণ দাসৰ তাৎক্ষণিক গ্ৰেপ্তাৰৰ দাবীত বিভিন্ন শ্লোগান দি পৰিৱেশ উত্তাল কৰি তোলে।
পিছত তেওঁলোকে জিলাখনৰ উপায়ুক্তৰ হাতত বিষয়টোৰ সন্দৰ্ভত এখন স্মাৰকপত্ৰ দাখিল কৰে। সন্থাৰ সভাপতি নিৰ্মল সৰকাৰ আৰু সাধাৰণ সম্পাদক পিণ্টু সৰকাৰৰ দ্বাৰা স্বাক্ষৰিত স্মাৰকপত্ৰত তোলা অভিযোগ মতে উক্ত গাঁও পঞ্চায়তত প্ৰধান মন্ত্ৰী আবাস যোজনা আঁচনিৰ হিতাধীকাৰী নিৰ্বাচনত ব্যাপক কেলেংকাৰি আৰু এনৰেগা (MNREGA) আঁচনিৰ কাম নকৰাকৈ ধন আত্মসাৎ কৰি অহা হৈছে।
অভিযোগ মতে গাঁও পঞ্চায়তখনৰ সভাপতি আৰু সচিবে প্ৰস্তুত কৰা তালিকাৰ মুঠ ৪০৭ গৰাকী হিতাধীকাৰীৰ মাত্ৰ ৫২ গৰাকীহে দৰিদ্ৰ সীমাৰেখাৰ তলৰ।
তদুপৰি সন্থাৰ সভাপতি নিৰ্মল সৰকাৰে সংবাদ মাধ্যমক জনাই যে অভিযুক্ত দুৰ্নীতিপৰায়ণ পঞ্চায়ত সচিব আৰু সভাপতিৰ বিৰুদ্ধে ইতিমধ্যে গৌৰীপুৰ আৰক্ষী থানাত গোচৰ ৰুজু কৰাৰ লগতে বিষয়টোৰ তদন্তৰ বাবে যোৱা ৪ মে’ত জিলা উপায়ুক্তক অভিযোগ দাখিল কৰা হৈছিল যদিও আজি ডেৰমাহ পাৰ হোৱা পিছতো এইক্ষেত্ৰত কোনো ব্যৱস্থা গ্ৰহণ কৰা হোৱা নাই।
যাৰ পৰিপ্ৰেক্ষিতত অনুসূচিত জাতি-জনজাতি নিবনুৱা সন্থাই গাঁওবাসীৰ সহযোগত আজি এই ধৰ্ণা কাৰ্যসূচী হাতত ল’বলৈ বাধ্য হয় বুলি সৰকাৰে মন্তব্য কৰে।
