ছেবাৰ কাণ্ড : মাৰ্ঘেৰিটাত নৱম শ্ৰেণীৰ কেইবাগৰাকী ছাত্ৰীৰ পঞ্জীয়নৰ চেক লিষ্টত লাগিল ভুল ফটো
মাধ্যমিক শিক্ষা পৰিষদ, অসমৰ দ্বাৰা ছাত্ৰ-ছাত্ৰীৰ জীৱনক লৈ হেতালি খেলাৰ এক নমুনা পুনৰ পোহৰলৈ আহিছে তিনিচুকীয়া জিলাৰ মাৰ্ঘেৰিটাত ।
উল্লেখযোগ্য যে, তিনিচুকীয়া জিলাৰ বিদ্যালয় সমূহৰ পৰিদৰ্শকৰ কাৰ্যালয়ত ছেবাৰ দ্বাৰা প্ৰেৰিত বিদ্যালয়সমূহৰ নৱম শ্ৰেণীৰ ছাত্ৰ-ছাত্ৰীসকলৰ পঞ্জীয়নৰ চেক লিষ্টসমূহ বিতৰণ কৰা হয়। উক্ত চেক লিষ্ট সমূহৰ ভিতৰতে মাৰ্ঘেৰিটা শিক্ষাখণ্ডৰ অন্তৰ্গত ১৬ খন বিদ্যালয়ৰ চেক লিষ্টো আছে, য’ত ভয়ানক বিসংগতি থকাৰ কথা পোহৰলৈ আহিছে।
স্মৰ্তব্য যে পেঙেৰী পৰীক্ষা কেন্দ্ৰৰ অন্তৰ্গত জ্ঞানোদয় উচ্চ মাধ্যমিক বিদ্যালয়, বুঢ়ীদিহিং আদৰ্শ বিদ্যালয় আৰু ছেণ্ট জেভিয়াৰ্ছ স্কুলৰ নৱম শ্ৰেণীৰ সৰ্বমুঠ ২৫৪ গৰাকী ছাত্ৰ-ছাত্ৰীৰ পঞ্জীয়নৰ বিতং তথ্যৰ সতে থাকিব লগা সংশ্লিষ্ট ছাত্ৰ-ছাত্ৰীৰ ফটোৰ স্থানত আন কোনো এখন বিদ্যালয়ৰ জনৈক ছাত্ৰীৰ ফটো সন্নিৱিষ্ট হৈছে।
উল্লেখযোগ্য যে বিগত ১৯৯৮ বৰ্ষৰ পৰা মাধ্যমিক শিক্ষা পৰিষদে নৱম শ্ৰেণীৰ ছাত্ৰ-ছাত্ৰী সকলৰ নাম সমূহ পঞ্জীয়নৰ ব্যৱস্থা প্ৰৱৰ্তন কৰে। এই পঞ্জীয়ন অফ লাইনৰ জৰিয়তে কৰা হৈছিল যদিও বিগত ৪/৫ বছৰৰ পৰা এই ব্যৱস্থা অন লাইনৰ জৰিয়তে সম্পন্ন কৰা হৈ আহিছে।
অন লাইনৰ জৰিয়তে ছাত্ৰ-ছাত্ৰীৰ ফটোসহ সম্পূৰ্ণ শুদ্ধ তথ্যৰে পূৰণ কৰা পঞ্জীয়ন কাৰ্ড সমূহৰ ক্ষেত্ৰত এনে অদ্ভুত বিভ্ৰাট কিদৰে সংঘটিত হ’বলৈ পালে সেয়া এতিয়া এক নুবুজা সাঁথৰ।
এনে মাৰাত্মক ভুলৰ বাবে ছেবাই কাক জগৰীয়া কৰিব? মন কৰিবলগীয়া যে পঞ্জীয়নত সংঘটিত এই বিসংগতি এটা কেন্দ্ৰৰহে, অন্যান্য সহস্ৰাধিক কেন্দ্ৰৰ ক্ষেত্ৰত কি ঘটিছে সেয়া এতিয়াও পোহৰলৈ অহা নাই।