ৰাজ্যত সম্প্ৰতি চোৰাং চিকাৰীৰ কাৰ্যকলাপ বৃদ্ধি পাই অহাৰ পৰিপ্ৰেক্ষিতত আৰক্ষী- প্ৰশাসনে ইয়াৰ বিৰুদ্ধে গ্ৰহণ কৰি তীব্ৰ পদক্ষেপ।
চোৰাং চিকাৰীক সহায় কৰাৰ অভিযোগৰ ভিত্তিতে শনিবাৰে জখলাবন্ধা আৰক্ষীয়ে দুজন লোকক আটক কৰাক লৈ সৃষ্টি হৈছে তীব্ৰ প্ৰতিক্ৰিয়াৰ।আৰক্ষী সূত্ৰই প্ৰকাশ কৰা অনুসৰি আটকাধীন দুয়োজন লোকে মণিপুৰৰ পৰা অহা চোৰাং চিকাৰীক সহায় কৰাৰ সন্দেহৰ ভিত্তিতে তেওঁলোকক আটক কৰা হৈছে।
উল্লেখযোগ্য যে বিগত প্ৰায় কিছুদিন ধৰি আৰক্ষী- নিৰাপত্তাবাহিনীয়ে কাজিৰঙা ৰাষ্ট্ৰীয় অভায়ৰণ্যত নিৰীক্ষণ অব্যাহত ৰখা সত্ত্বেও গঁড় হত্যাৰ পৰিসংখ্যা বৃদ্ধি পোৱা পৰিলক্ষিত হৈছে।
জখলাবন্ধা আৰক্ষীয়ে শনিবাৰে আটক কৰা যুৱক দুজন হৈছে খেলমাটিৰ ৰাম নাথ তাঁতী (২৭) আৰু হৰগাঁৱৰ বাধনা মূৰা (৩৫)।
জখলাবন্ধা আৰক্ষী চকীৰ ভাৰপ্ৰাপ্ত বিষয়া দেৱেন বৰুৱাই প্ৰকাশ কৰা অনুসৰি কাজিৰঙা ৰাষ্ট্ৰীয় উদ্যানত গঁড় হত্যাৰ বাবে অহা মণিপুৰৰ চোৰাং চিকাৰীক সহায় কৰি আহিছিল ধৃত যুৱক দুজনে।আনকি যুৱক দুজনে চোৰাং চিকাৰীক খাদ্য, আশ্ৰয় তথা অন্যান্য যাৱতীয় সামগ্ৰী যোগানেৰে সহায় কৰি আহিছিল।
ঘটনাটোৱে সমগ্ৰ অঞ্চলত সৃষ্টি কৰিছে তীব্ৰ প্ৰতিক্ৰিয়াৰ। আনহাতে চোৰাং চিকাৰীক সহায় কৰি অহা যুৱক দুজনক কৰায়ত্ত কৰাৰ বাবে ৰাইজে শলাগ লৈছে জখলাবন্ধা আৰক্ষীৰ।
