জুৱেলাৰিৰ দোকান খুলি ড্ৰাগছৰ বেহা চলাই থকা দুজন ব্যক্তিক কালি মহানগৰীত আৰক্ষীয়ে গ্ৰেপ্তাৰ কৰে। ব্যক্তি দুজনৰ নাম ক্ৰমে বিনোদ বাৰ্মা আৰু দিলীপ বাৰ্মা। মহানগৰীৰ পল্টন বজাৰৰ নেপালী মন্দিৰ পথত তেওঁলোকৰ হীৰালাল জুৱেলাৰি নামেৰে এখন দোকান আছে।
দুয়োজনেই বহু দিনৰ পৰা অবৈধ ড্ৰাগছৰ চোৰাং ব্যৱসায় চলাই আছিল বুলি আৰক্ষীৰ সূত্ৰই কয়। আৰক্ষীয়ে অভিযানৰ সময়ত কণ্টেইনাৰত ভৰাই ৰখা অৱস্থাত ব্ৰাউন ছুগাৰ উদ্ধাৰ কৰে।
উল্লেখযোগ্য যে ১৭ ফেব্ৰুৱাৰিত মহানগৰ আৰক্ষীয়ে অবৈধ ড্ৰাগছৰ সৰবৰাহকাৰীৰ বিৰুদ্ধে ব্যাপক অভিযান চলাইছিল। মহানগৰীৰ প্ৰায় ৩০ টা স্থানত একেসময়তে চলোৱা এই অভিযানত আৰক্ষীয়ে প্ৰায় ৩০ জন লোকক আটক কৰে। ইয়াৰে দুগৰাকী মহিলাকে ধৰি ১৩জন ড্ৰাগছ ব্যৱসায়ীক গ্ৰেপ্তাৰ কৰে।
বিনোদ বাৰ্মা আৰু দিলীপ বাৰ্মাৰ উপৰি গ্ৰেপ্তাৰ কৰা আন ড্ৰাগছ ব্যৱসায়ীকেইজন হ’ল ক্ৰমে গড়চুক কটাহবাৰীৰ তাচৰ আলী, জালুকবাৰী কাটিয়া দলঙৰ ৰুবী আলী, মছজিদ গলিৰ নীৰা দাস, নুনমাটি আনন্দনগৰৰ বিক্ৰম দাস, মিণ্টুল হক, ইছলামপট্টিৰ মোজাম্মিল হক ওৰফে আপ্পা, কালীবাৰী ৰে’লৱে কলনিৰ মালা বৰুৱা, দক্ষিণ শৰণীয়াৰ ৰাজু ৰাও, অভিষেক ৰাও আৰু মহেশ প্ৰসাদ কুণ্ডু, বামুণীমৈদাম ৰে’লৱে কলনিৰ ভৱতেশ দাস।
উল্লেখযোগ্য যে ইয়াৰে মোজাম্মিল হক প্ৰাক্তন ক্ৰিকেট খেলুৱৈ। তেওঁক পূৰ্বেও আৰক্ষীয়ে ড্ৰাগছৰ ব্যৱসায় কৰাৰ অপৰাধত গ্ৰেপ্তাৰ কৰিছিল।