ডিমাপুৰত অসম ৰাইফলছৰ জালত এন এছ চি এন (আই এম)ৰ কেডাৰ আৰু অস্ত্ৰ সৰবৰাহকাৰী
যোৱা দুটা দিনত ডিমাপুৰত অসম ৰাইফলছে আৰু আৰক্ষীয়ে অভিযান চলাই এজন এন এছ চি এন (আই এম)ৰ কেডাৰ আৰু এগৰাকী অস্ত্ৰ সৰবৰাহকাৰীক গ্ৰেপ্তাৰ কৰে।
অসম ৰাইফলছৰ দ্বাৰা প্ৰকাশিত এক প্ৰেছ বিজ্ঞপ্তি মতে পেৰেন জিলাত এন এছ চি এন (আই এম)ৰ ধন দাবী চলাই অহাৰ খবৰ এক গোপন সূত্ৰৰ পৰা লাভ কৰাৰ পিছতে অসম ৰাইফলছে আৰক্ষীৰ সহযোগত ছেইলহেম গাঁৱত অভিযান চলাই মঙলবাৰে সংগঠনটোৰ এজন কেডাৰক আটক কৰে। আটকাধিন কেডাৰজনক জিলাখনৰ নোকলাক চহৰৰ স্বয়ম্ভু প্ৰাইভেট পোংগাম (২৩) বুলি চিনাক্ত কৰা হৈছে।
তেওঁৰ পৰা এটা এ কে-৪৭ ৰাইফল, ৬৫ জাঁই সক্ৰিয় গুলী আৰু বহু আপত্তিজনক নথি-পত্ৰ জব্দ কৰা হয়। পিছত তেওঁক আঠিবুং আৰক্ষীক গতাই দিয়া হয়।
আনহাতে, যোৱা বুধবাৰে অসম ৰাইফলছৰ ডিমাপুৰ বেটেলিয়নে নগৰখনৰ ছুপাৰমাৰ্কেটত অভিযান চলাই এগৰাকী অস্ত্ৰ সৰবৰাহকাৰীক আটক কৰে। তেওঁক আব্দুল কৰিম (৩২) বুলি চিনাক্ত কৰা হৈছে। মৰিগাঁও জিলাৰ জালুগোটিৰ বাসিন্দা আব্দুল বৰ্তমান পূব ডিমাপুৰৰ নাহৰবাৰী গাঁৱত বাস কৰি আছে। তেওঁৰ পৰা এটা .৩২ এম এম পিষ্টল, মেগাজিন আৰু আপত্তিজনক নথি-পত্ৰ জব্দ কৰা হয়।
পিছত তেওঁক পৰৱৰ্তী তদন্তৰ বাবে পূব ডিমাপুৰ আৰক্ষীক চমজাই দিয়া হয়।