অসম-নাগালেণ্ড সীমান্তত পুনৰ তীব্ৰ উত্তেজনাই বিৰাজ কৰিছে। গোলাঘাট জিলাৰ সৰুপথাৰ সমজিলাৰ অন্তৰ্গত চেইনপুৰ (নগাৰ মতে ৰালান বস্তি) অঞ্চলত দুয়োখন ৰাজ্যৰ সীমান্তৱৰ্তী বিবাদক কেন্দ্ৰ কৰি দেওবাৰে এক অপ্ৰীতিকৰ পৰিস্থিতিৰ সৃষ্টি হয়। কেন্দ্ৰীয় সংৰক্ষিত আৰক্ষী বাহিনীৰ ওপৰত নগা আক্ৰমণে সীমান্তৰ জনসাধাৰণৰ মাজত তীব্ৰ আতংকৰ সৃষ্টি কৰিছে।
প্ৰাপ্ত তথ্য অনুসৰি, চেইনপুৰত পূৰ্বতে নগাই নিৰ্মাণ কৰা এটা পেট্ৰ’ল পাম্প দুয়োখন ৰাজ্যৰ প্ৰশাসনৰ হস্তক্ষেপত বন্ধ কৰি থোৱা হৈছিল। কিন্তু শেহতীয়াকৈ অসম চৰকাৰ তথা সৰুপথাৰ সমজিলাৰ সীমান্ত দণ্ডাধীশৰ কোনো অনুমতি নোলোৱাকৈয়ে নগাই উক্ত পেট্ৰ’ল পাম্পটো পুনৰ মুকলি কৰে। এই খবৰ পোৱাৰ পাছত চিআৰপিএফৰ এটা দলে পাম্পটো বন্ধ কৰিবলৈ গৈছিল।
চিআৰপিএফে বাধা প্ৰদান কৰিবলৈ যোৱাৰ সময়তে স্থানীয় নগা লোকসকলে দা, লাঠি, চোকা অস্ত্ৰ আৰু কেটেপা লৈ অৰ্ধসামৰিক বাহিনীটোৰ ওপৰত জপিয়াই পৰে। আগ্ৰাসী নগাৰ যুদ্ধংদেহী ৰূপৰ সন্মুখত সশস্ত্ৰ চিআৰপিএফ বাহিনী দুখোজ পিছুৱাবলৈ বাধ্য হয়। হাতত আধুনিক অস্ত্ৰ থকাৰ পাছতো উগ্ৰ নগা লোকসকলৰ আক্ৰমণাত্মক স্থিতিৰ বাবে বাহিনীটোৱে অসহায়বোধ কৰা পৰিলক্ষিত হয়।
এই সন্দৰ্ভত সৰুপথাৰ সমজিলা চুতীয়া ছাত্ৰ সন্থাৰ উপদেষ্টা হেমন্ত বৰাই চৰকাৰৰ ভূমিকাক তীব্ৰ সমালোচনা কৰে। তেওঁ কয়, “পূৰ্বতে বন্ধ কৰি দিয়া পেট্ৰ’ল পাম্পটো নগাই জোৰ-জুলুমকৈ মুকলি কৰিছে। সশস্ত্ৰ চিআৰপিএফক যদি নগাই এইদৰে দমন কৰিব পাৰে, তেন্তে সীমান্তত বসবাস কৰা সাধাৰণ অসমীয়া জনতাৰ সুৰক্ষা ক’ত? কিছুদিন পূৰ্বে চুঙাজানত নগাই গেট স্থাপন কৰিছিল, এতিয়া চেইনপুৰত এই কাণ্ড সংঘটিত কৰিছে।” তেওঁ সীমান্তবাসীৰ জীৱন আৰু সম্পত্তিৰ সুৰক্ষা নিশ্চিত কৰিবলৈ চৰকাৰক দাবী জনায়।
সীমান্তৰ এই জ্বলন্ত সমস্যা সমাধানৰ ক্ষেত্ৰত বিভাগীয় মন্ত্ৰী অতুল বৰাৰ ভূমিকাক লৈও প্ৰশ্ন উত্থাপন কৰিছে চুতীয়া ছাত্ৰ সন্থাই। ছাত্ৰ নেতাগৰাকীয়ে অভিযোগ কৰে যে নিজৰ জিলাৰে মন্ত্ৰী হোৱাৰ পাছতো বিগত পাঁচ বছৰে তেওঁ এবাৰো সীমান্তলৈ আহি ৰাইজৰ খবৰ লোৱা নাই। মন্ত্ৰীগৰাকীয়ে কেৱল নিজৰ পদবী সুৰক্ষিত কৰাতহে ব্যস্ত বুলি কটাক্ষ কৰি তেওঁক স্বেচ্ছাই পদত্যাগ কৰিবলৈ দাবী জনাইছে। লগতে সকীয়াই দিয়ে যে, পৰৱৰ্তী সময়ত মন্ত্ৰীগৰাকীয়ে সীমান্তলৈ আহিলে ৰাইজৰ তীব্ৰ প্ৰতিবাদৰ সন্মুখীন হ’ব।
