অলপতে অসম চৰকাৰে ৰাজ্যত আমদানিকৃত গামোচাৰ বিক্ৰী বন্ধ কৰাৰ যি ঘোষণা কৰিছিল তাৰ প্ৰতি সঁহাৰি জনাই ডিমৌৰ সমীপৰ ধেমেচি তেলীয়াপথাৰ গাওঁৰ জীয়ৰী-বোৱাৰিসকলে আগন্তুক বহাগ বিহুৰ পূৰ্বে ১০ হাজাৰ গামোচা বৈ উলিওৱাৰ লক্ষ্য নিৰ্ধাৰণ কৰিছে।
উল্লেখ্য যে তেলিয়াপথাৰ পুণ্য অৰণ্য নামঘৰৰ ভক্তপ্ৰাণ ৰাইজৰ উদ্যোগত শিপিনীসকলৰ বাবে নিৰ্মাণ কৰি দিয়া হৈছে বিশাল মাটিশাল গৃহ। উক্ত গৃহত ২৫ খনকৈ মাটিশালত থলুৱা পকোৱা সূতা ক্ৰয় কৰি যঁতৰ ঘূৰাই মহৰা ভৰাই মাটিশালত গামোচা তৈয়াৰ কৰাত ব্যস্ত হৈ আছে গাঁৱৰ শিপিনীসকল।
সম্পূৰ্ণ আধ্যাত্মিক নিয়মেৰে পুৱাৰ ভাগত নামঘৰত সকলো শিপিনীয়ে সেৱা গ্ৰহণ কৰি দিনটোৰ বাবে নিজ কৰ্মত নিয়োজিত হোৱা পৰিলক্ষিত হয়। পুণ্য অৰণ্য নামঘৰৰ কাষতে স্থাপন কৰা মাটিশালৰ মাকোৰ শব্দৰ সমান্তৰালকৈ হৰিনামৰ উচ্চাৰণে প্ৰতিদিনাই সৃষ্টি কৰিছে এক বৰ্ণময় পৰিৱেশৰ।
নামঘৰৰ অন্যতম উদ্যোক্তা মৃদুল দিহিঙীয়াৰ পৰা জানিব পৰা গৈছে যে শিপিনীসকলে তৈয়াৰ কৰা গামোচা বজাৰত বিক্ৰী কৰি অসমৰ থলুৱা বস্ত্ৰ জীয়াই ৰখাৰ লগতে তাৰ পৰা আহৰণ কৰা লাভৰ এটা অংশ নামঘৰৰ বাবে অৰ্পণ কৰা হ’ব। আৰু তেওঁলোকে ব’হাগ বিহুৰ আগে আগে ২৫ খন মাটিশালত ১০ হাজাৰ গামোচা প্ৰস্তুত কৰি বজাৰলৈ উলিয়াই দিবলৈ সক্ষম হ’ব।
পুণ্য অৰণ্য নামঘৰৰ উদ্যোগত সমবায় ভিত্তিত আৰম্ভ কৰা এই গামোচা তৈয়াৰ কৰা মাটিশাল গৃহটি ডিমৌৰ দাঁতিকাষৰীয়া গাওঁ সমূহৰ শিপিনীসকলৰ বাবে আকৰ্ষণৰ কেন্দ্ৰবিন্দু হৈ পৰা পৰিলক্ষিত হৈছে।