দুই দশকৰ পাছত ত্ৰিপুৰাৰ পৰা মিজোৰামলৈ উভতিব ব্ৰু শৰণাৰ্থী

কেন্দ্ৰীয় চৰকাৰৰ মধ্যস্থতাত নতুন দিল্লীত মঙলবাৰে ব্ৰু জনগোষ্ঠীৰ শৰণাৰ্থীৰ প্ৰত্যাৱৰ্তন সন্দৰ্ভত এখন ঐতিহাসিক ত্ৰিপাক্ষিক চুক্তি সম্পন্ন হয়। এই চুক্তি অনুসৰি ত্ৰিপুৰাত আশ্ৰয় লৈ থকা ব্ৰু জনগোষ্ঠীৰ ৩২,৮৭৬ জন শৰণাৰ্থী মিজোৰামলৈ প্ৰত্যাৱৰ্তন কৰিব ২২ বছৰৰ পাছত।

কেন্দ্ৰীয় গৃহ মন্ত্ৰী ৰাজনাথ সিং, ত্ৰিপুৰাৰ মুখ্য মন্ত্ৰী বিপ্লৱ দেব আৰু মিজোৰামৰ মুখ্য মন্ত্ৰী লালথান হাওলাৰ উপস্থিতিত, কেন্দ্ৰ, দুই ৰাজ্য চৰকাৰৰ উপৰি মিজোৰাম ব্ৰু ৰিপ্লেছভ পিপলছ ফ’ৰামৰ প্ৰতিনিধিয়ে এই ঐতিহাসিক ত্ৰিপাক্ষিক চুক্তিত স্বাক্ষৰ সম্পাদিত কৰে।

এই চুক্তি অনুসৰি ত্ৰিপুৰাৰ অস্থায়ী শিবিৰত যোৱা ২১ বছৰ ধৰি বাস কৰি অহা ৫,৪০৭ টা পৰিয়ালৰ ব্ৰু শৰণাৰ্থীসকল অহা ৩০ ছেপ্তেম্বৰৰ ভিতৰত তেওঁলোকে মিজোৰামলৈ প্ৰত্যাৱৰ্তন কৰিব। আৰু ইয়াৰ লগে লগে উত্তৰ ত্ৰিপুৰাত থকা এই অস্থায়ী শিবিৰ সমূহ অক্টোবৰ মাহৰ প্ৰথম সপ্তাহৰ পৰা বন্ধ হৈ পৰিব।