এগৰাকী মহিলাক দলবদ্ধ ধৰ্ষণ কৰাৰ লগতে তেওঁৰ মুখমণ্ডল আৰু শৰীৰৰ কেইবাটাও অংশ এচিডেৰে জ্বলাই দিয়া হৈছিল। সেইদিনা ৰক্ষকেই হৈ পৰিছিল ভক্ষক। প্ৰায় আঠ বছৰ পূৰ্বে সংঘটিত এই জঘন্য অপৰাধৰ গোচৰত মিজোৰামৰ এখন আদালতে গুৰুত্বপূৰ্ণ ৰায়দান দিছে।
অতিৰিক্ত জিলা আৰু সত্ৰ ন্যায়াধীশ চিলভি জোমুৱানপুই ৰাল্টেই এই কাণ্ডত দোষী সাব্যস্ত হোৱা বি এছ এফৰ জোৱান দুজনক ৪২ বছৰৰ কঠোৰ কাৰাদণ্ডৰ শাস্তি প্ৰদান কৰে।
এই গোচৰত দোষী সাব্যস্ত হোৱা অভিযুক্ত দুজন হৈছে নীলাঞ্জন দাস আৰু দীনেশ কুমাৰ। ঘটনাৰ সময়ত তেওঁলোকে মিজোৰাম-বাংলাদেশ সীমান্তৰ গাতে লাগি থকা অঞ্চলৰ বি এছ এফৰ এটা শিবিৰত কৰ্মৰত আছিল।
দীৰ্ঘদিনীয়া তদন্ত আৰু বিচাৰ প্ৰক্ৰিয়াৰ অন্তত অতিৰিক্ত জিলা আৰু সত্ৰ ন্যায়াধীশ চিলভি জোমুৱানপুই ৰাল্টেই তেওঁলোকক ১২ জুনত বিভিন্ন ধাৰাত দোষী সাব্যস্ত কৰি পিছত শাস্তি ঘোষণা কৰে।
যোৱা ২০১৭ চনৰ ১৬ জুলাইত মিজোৰামৰ মামিত জিলাৰ শিলচুৰি পশ্চিম গাঁৱৰ গাছকাটা নদীৰ সমীপত সংঘটিত হৈছিল এই ঘটনা। তদন্ত অনুসৰি কেঁকোৰা আৰু বনৰীয়া শাক-পাচলি সংগ্ৰহৰ বাবে বনাঞ্চললৈ গৈছিল যুৱতীগৰাকী আৰু তেওঁৰ এগৰাকী সংগী। সেই সময়ত তেওঁলোকে অভিযুক্তক লগ পাইছিল।
অভিযোগ অনুসৰি, পিছত যুৱতীগৰাকীক বলপূৰ্বকভাৱে ওচৰৰ তামোলৰ বাগানলৈ লৈ গৈ দলবদ্ধ ধৰ্ষণ কৰে আৰু তাৰ পিছত বি এছ এফৰ জোৱান দুজনে মুখত এচিড ঢালি দিয়ে। ভুক্তভোগীৰ শৰীৰৰ কেইবাটাও অংশত এচিড ছিটিকি পৰে।
ভুক্তভোগী মহিলাগৰাকীয়ে আদালতত জনোৱা মতে, এই আক্ৰমণৰ ফলত তেওঁ শৰীৰৰ কেইবাটাও ঠাইত গুৰুতৰভাৱে আঘাতপ্ৰাপ্ত হয়। তেওঁৰ গোটেই মুখখন পোৰাৰ ফলত বিকৃত হৈ পৰিছিল। আনকি তেওঁৰ এটা চকুৰ দৃষ্টিশক্তিও হেৰুৱাই পেলায়। গোচৰৰ তদন্তৰ সময়ত ভুক্তভোগীৰ কাপোৰ, ঘটনাস্থলী আৰু অন্যান্য প্ৰমাণৰ পৰা ফৰেনছিক তথ্য সংগ্ৰহ কৰা হয়। পিছত টেষ্ট আইডেন্টিফিকেশ্যন পেৰেডতো তেওঁ অভিযুক্তক চিনাক্ত কৰে। আদালতে তেওঁৰ সাক্ষ্যক সামঞ্জস্যপূৰ্ণ আৰু বিশ্বাসযোগ্য বুলি অভিহিত কৰে।
শাস্তিৰ ক্ষেত্ৰত আদালতে তিনিটা পৃথক অপৰাধৰ বাবে পৃথক পৃথক শাস্তি নিৰ্ধাৰণ কৰিছে – দলবদ্ধ ধৰ্ষণৰ বাবে ২০ বছৰ, গুৰুতৰ শাৰীৰিক ক্ষতি কৰা ধৰ্ষণৰ বাবে ১০ বছৰ আৰু এচিড আক্ৰমণৰ বাবে ১২ বছৰ। আদালতে কয় যে এই শাস্তিসমূহ একেৰাহে চলিব, যাৰ ফলত মুঠ ৪২ বছৰৰ কাৰাদণ্ড হ’ব। ইয়াৰ উপৰিও প্ৰতিজন অভিযুক্তক ৬০ হাজাৰ টকা জৰিমনা বিহা হৈছে। আদালতে জৰিমনা আদায় অবিহনে অতিৰিক্ত কাৰাদণ্ড ভুগিব লাগিব বুলি উল্লেখ কৰিছে৷
অৱশ্যে এই গোচৰৰ আন এটা গুৰুত্বপূৰ্ণ দিশৰ ওপৰতো মন্তব্য কৰে আদালতে। ঘটনাৰ কেইদিনমান পিছতে উদ্ধাৰ হৈছিল সংগীজনৰ মৃতদেহ। কিন্তু সেই মৃত্যুত অভিযুক্ত দুজন জোৱানক দোষী সাব্যস্ত কৰিব পৰা নগ’ল।
ন্যায়াধীশৰ পৰ্যবেক্ষণ যে – হত্যাকাণ্ডৰ সৈতে অভিযুক্তৰ প্ৰত্যক্ষ সম্পৰ্ক প্ৰমাণ কৰিবলৈ বিচাৰ বিভাগে সম্পূৰ্ণ পৰিস্থিতিগত প্ৰমাণ দেখুৱাব পৰা নাছিল। ফলত তেওঁলোক সেই অভিযোগৰ পৰা মুক্ত হ’ল। প্ৰায় আঠ বছৰৰ বিচাৰৰ অন্তত এই ৰায়ক লৈ মিজোৰামত আলোড়নৰ সৃষ্টি হৈছে।
