নগাঁৱৰ ৰূপহীহাট আৰক্ষী চকীত আজি বিয়লি ধৰ্ষণকাৰীক ৰাইজৰ হাতত চমজাই দিয়াৰ দাবীত এক উত্তাল পৰিৱেশৰ সৃষ্টি হয়।
প্ৰাপ্ত তথ্য মতে চামগুৰিৰ মাগুৰমাৰীৰ ৫ বছৰীয়া এটি শিশুক জামিৰ আলী নামৰ এজন বৃদ্ধই ধৰ্ষণ কৰা বুলি অভিযোগ তুলি কাৱৈমাৰী অৰক্ষী চকীত এজাহাৰ দাখিল কৰিছিল।
উক্ত এজাহাৰৰ ভিত্তিতে আৰক্ষীয়ে আজি ধৰ্ষণকাৰী জামিৰ আলীক আটক কৰি ৰূপহীহাট থানালৈ আনে।
ইফালে ধৰ্ষণকাৰী জামিৰ আলীক আটক কৰা বুলি স্থানীয় ৰাইজে জানিব পাৰি ৰূপহীহাট থানাত উপস্থিত হৈ এক উত্তপ্ত পৰিস্থিতিৰ সৃষ্টি কৰে। উত্তেজিত ৰাইজে ধৰ্ষণকাৰীক তেওঁলোকৰ হাতত চমজাই দিয়াৰ দাবী তোলে।
আনহাতে প্ৰতিবাদকাৰী সকল ইমানেই উত্তেজিত হৈ পৰে যে তেওঁলোকে আৰক্ষী থানাত আক্ৰমণৰ চেষ্টা কৰে। ফলত অৰক্ষীয়ে প্ৰতিবাদকাৰীক ছত্ৰভংগ দিবলৈ লাঠী চালনা কৰিবলৈ বাধ্য হয়।
উক্ত লাঠী চালনাত পুৰুষ-মহিলাকে ধৰি কেইবাজনো প্ৰতিবাদকাৰী কম-বেছি পৰিমাণে আঘাতপ্ৰাপ্ত হয়।
ইফালে অঞ্চলটোৰ সচেতন ৰাইজে এনেদৰে প্ৰতিবাদকাৰী সকলে আইন হাতত তুলি লোৱা ঘটনাক গৰিহণা দি সমগ্ৰ ঘটনাটোৰ আৰক্ষীক উচিত তদন্ত কৰি দোষীক শাস্তি দিয়াৰ বাবে আহ্বান জনায়।
