নাগৰিকত্ব সংশোধনী বিধেয়ক ২০১৬ বাতিলৰ দাবীত সদৌ অসম কৰ্মচাৰী পৰিষদৰ মুকলিকৈ আন্দোলন ঘোষণাৰ বিৰুদ্ধে সৰৱ হৈ পৰিছে বৰাক উপত্যকাৰ ছাত্র সংগঠন সদৌ কাছাৰ কৰিমগঞ্জ হাইলাকান্দি ছাত্র সংস্থা চমুকৈ আকছা।
শিলচৰত এখন সংবাদ মেল পাতি আকছাৰ মুখ্য উপদেষ্টা ৰূপম নন্দী পুৰকায়স্থই কয়— চৰকাৰী কৰ্মচাৰীৰ স্বার্থৰ বাবে গঠিত কৰ্মচাৰী পৰিষদৰ নেতাসকলৰ ৰাজহুৱাকৈ বিধেয়কৰ বিৰোধীতা কৰা বিষয়টো সন্দৰ্ভত ৰাজ্য চৰকাৰে বিহীত ব্যৱস্থা লোৱা প্রয়োজন। কিয়নো কৰ্মচাৰী পৰিষদ হৈছে এটা অৰাজনৈতিক সংগঠন। সমগ্ৰ ৰাজ্যখনত বিভিন্ন জাতি আৰু জনগোষ্ঠীৰ লোক কৰ্মচাৰী হিচাপে কর্মৰত। পৰিষদৰ নেতাসকলৰ যদি ৰাজনীতি কৰিবলৈ প্ৰয়োজন তেন্তে তেওঁলোকে মুকলিকৈ ৰাজনৈতিক দল খুলি ৰাজনীতি কৰা উচিত।
ছাত্ৰ নেতাজনে লগতে কয় যে চৰকাৰী কৰ্মচাৰীয়ে এনে ধৰণৰ বিষয়ত মতামত দিলে সেয়া সৰ্বভাৰতীয় চৰকাৰী নীতি তথা ইণ্ডিয়া ছার্ভিচ ৰুল ১৯৬৮ৰ ৭নং ধাৰা অনুসৰি দ্ৰুত ব্যৱস্থা লোৱা উচিত। চৰকাৰে পৰিষদৰ নেতাসকলৰ বিৰুদ্ধে শীঘ্ৰ ব্যৱস্থা গ্ৰহণ কৰক।
আনহাতে এনআৰচি ৰূপায়ণৰ ক্ষেত্ৰত বাঙালীসকলকৰ ওপৰত নিৰ্যাতন চলোৱা হৈছে বুলি উল্লেখ কৰি ছাত্ৰ নেতাজনে লগতে কয় যে এইক্ষেত্ৰত এনআৰচিৰ সমন্বয়ক প্ৰতীক হাজেলাৰ ভূমিকা সন্দেহজনক।
উল্লেখযোগ্য যে সংবাদ মেলখনত অধ্যাপক নিৰঞ্জন দত্ত, বিকাশ ভট্টাচাৰ্য, বিশ্বজিৎ দেৱ আদিয়েও বক্তব্য আগবঢ়ায়।
