নাগৰিকত্ব সংশোধনী বিধেয়ক ২০১৬ ৰ বিৰুদ্ধে অসম সাহিত্য সভাই তেওঁলোকৰ স্থিতি পুনৰ দোহাৰিছে। অসম সাহিত্য সভাই বৃহস্পতিবাৰে এটা বিবৃতি প্ৰকাশ কৰি কয় যে হিন্দু বঙালী শৰণাৰ্থীসকলক নাগৰিকত্ব প্ৰদান কৰি কেন্দ্ৰীয় চৰকাৰে অসমত সংস্থাপনৰ বাবে চলোৱা প্ৰচেষ্টা অসম আৰু অসমীয়া ভাষা-সাহিত্যৰ বাবে অতিশয় বিপজ্জনক।
অসমত বিদেশী বিতাৰণৰ বাবে কৰা আন্দোলনত মৃত্যুক আকোঁৱালি লোৱা শ শ শ্বহীদৰ ত্যাগক অসন্মান কৰাৰ অধিকাৰ কাৰো নাই বুলি উল্লেখ কৰি অসম সাহিত্য সভাই কেন্দ্ৰীয় চৰকাৰক শীঘ্ৰেই প্ৰস্তাৱিত নাগৰিকত্ব সংশোধনী বিধেয়কখন বাতিল কৰিবলৈ দাবী জনোৱাৰ লগতে অসম চুক্তিৰ প্ৰতিটো দফা আখৰে আখৰে পালন কৰি অসমীয়া জাতিৰ ৰক্ষা কৱচ সুনিশ্চিত কৰিবলৈ আহ্বান জনায়।
অসম সাহিত্য সভাৰ সভাপতি ড০ পৰমানন্দ ৰাজবংশী আৰু সাধাৰণ সম্পাদক পদুম ৰাজখোৱাই স্বাক্ষৰ কৰা বিবৃতিটোত নাগৰিকত্ব সংশোধনী বিধেয়ক সন্দৰ্ভত যুটীয়া সংসদীয় সমিতিয়ে নতুন দিল্লীত শুনানি গ্ৰহণ কৰা কাৰ্যকো সমালোচনা কৰা হয়। বিবৃতিটোত অসমৰ সমস্যা অসমলৈ আহি অসমৰ জাতীয় ভাৱাপন্ন দল-সংগঠনৰ সৈতে বিস্তৃত আলোচনা কৰি সমাধান কৰিবলৈকো কেন্দ্ৰীয় চৰকাৰক আহ্বান জনোৱা হয়।
অসমৰ জাতীয় জীৱনৰ সৈতে জড়িত বিষয়ত অসম সাহিত্য সভাৰ এক বিশেষ ভূমিকা আছে। বিগত সময়ত এনে বহু সমস্যাৰ ক্ষেত্ৰত সাহিত্য সভাৰ ভূমিকাক লৈ প্ৰশ্ন উত্থাপিত হোৱাৰ লগতে সভাৰ কাম কাজক সমালোচনা কৰা হৈছিল। নাগৰিকত্ব সংশোধনী বিধেয়কৰ দৰে অসমৰ জাতীয় জীৱনৰ প্ৰশ্ন জড়িত থকা বিষয়ত সাহিত্য সভাই স্থিতি স্পষ্ট কৰাত সকলোৱে আদৰণি জনাইছে।
