নাগৰিকত্ব সংশোধনী বিধেয়ক, ২০১৬ৰ বিৰোধিতাৰে সমগ্র ৰাজ্য উত্তাল হৈ থকাৰ সময়তে আটাছু গৌৰীসাগৰ আঞ্চলিক সমিতিৰ উদ্যোগত বৃহত্তৰ অঞ্চলটোৰ জাতি জনগোষ্ঠী, দল-মত নিৰ্বিশেষে সৰ্বস্তৰৰ ৰাইজৰ সহযোগত আজি সন্ধ্যা এক বৃহৎ প্ৰতিবাদী জোঁৰ সমদল বাহিৰ কৰা হয়।
গৌৰীসাগৰ পৰিবহন নিগমৰ ৰাজ্যিক বাছ আস্থানৰ সন্মুখৰপৰা গৌৰীসাগৰ থানা তিনিআলিলৈকে ৩৭ নং ৰাষ্ট্ৰীয় ঘাই পথেৰে সহস্ৰাধিক আটাছুৰ সদস্য তথা ৰাইজে হাতে হাতে জোঁৰ লৈ ‘নাগৰিকত্ব (সংশোধনী) বিধেয়ক, ২০১৬ শীঘ্ৰে বাতিল কৰক’, ‘বিজেপি চৰকাৰ হায় হায়’, ‘বিদেশী নাগৰিকৰ নাম বহিৰ্ভুত এখন শুদ্ধ নাগৰিক পঞ্জী প্ৰস্তুত কৰক’, ‘অসম চুক্তি আখৰে আখৰে ৰূপায়ন কৰক’, ‘জাতি ধ্বংসী বিধেয়কৰ প্ৰবক্তা বিজেপি দল হুচিয়াৰ’ আদি শ্ল’গানেৰে আকাশ বতাহ কপাই তোল।
আজিৰ এই প্ৰতিবাদী জোঁৰ সমদলত আটাছুৰ কেন্দ্ৰীয় সমিতিৰ উপদেষ্টা অশ্বিনী চেতিয়া, কেন্দ্ৰীয় উপ-সভাপতি বসন্ত গগৈ, শিৱসাগৰ জিলা সমিতিৰ উপ-সভাপতি মৌচুম বুঢ়াগোহাঁই, সহ সাধাৰণ সম্পাদক পিংকু বৰা, সাংগঠনিক সম্পাদক অখিল আহোমকে ধৰি আমগুৰি আৰু গৌৰীসাগৰ আঞ্চলিক সমিতিৰ বহুকেইজন বিষয়ববীয়াই অংশগ্ৰহণ কৰে।
