শেহতীয়াকৈ নামৰূপৰ কেইবাটাও অঞ্চলত বনৰীয়া হাতীৰ উপদ্ৰৱে স্থানীয় লোকৰ ব্যাপক ক্ষতি কৰাৰ লগতে জীৱনৰ প্ৰতিও ভাবুকি আনিছে।
জানিব পৰা মতে, যোৱানিশাও বনৰীয়া হাতীয়ে ফৰেষ্ট কলনিৰ সন্মুখতে ধোদৰ আলিত থকা এটা বিদ্যুতৰ খুঁটা ভাঙি পেলায়। ইয়াৰ উপৰি, পানীচুকীয়া বনগাৱঁত বনৰীয়া হাতীয়ে দুটাকৈ ঘৰ ভাঙি পেলায়। ঘৰ দুটা ক্ৰমে বিজু গুৰুং আৰু ৰেণুকা ছেত্ৰীৰ বুলি জানিব পৰা গৈছে।
আনহাতে আজি দিনৰ দহ বজাত বনৰীয়া হাতীয়ে প্ৰায় এঘণ্টা ধৰি ধোদৰ আলিটোত থিয় হৈ থাকি মানুহ-গাড়ীৰ আহ-যাহ বন্ধ কৰি ৰাখে।
বনৰীয়া হাতীৰ শেহতীয়া এই উপদ্ৰৱৰ বাবে আজি বন বিভাগে স্থানীয় লোকৰ লগ হৈ পানীচুকীয়া বনগাৱঁত এখন কমিটি গঠন কৰে। এই কমিটিখনে ৰাতি অঞ্চলটোত পাল পাতি পহৰা দিয়াৰ সংকল্প লৈছে। বন বিভাগ আৰু স্থানীয় ৰাইজ উভয়েই এই সংকল্প লোৱা বুলি জানিব পৰা গৈছে।
উল্লেখযোগ্য যে হাবিত খাদ্যৰ নাটনি আৰু অন্যান্য কাৰণত বনৰীয়া হাতী মানুহৰ বসতিৰ মাজলৈ ওলাই অহাটো অসমত এটা নৈমিত্তিক ঘটনাত পৰিণত হৈছে। ইয়াৰ ফলত বহু সময়ত হাতীৰ আৰু বহু সময়ত মানুহৰো মৃত্যু হৈছে।
