দেশৰ এসময়ৰ তাৰকা ফুটবলাৰ তথা অৰ্জুন বঁটা প্ৰাপক বাইচুং ভুটীয়াই আজি এটা নতুন ৰাজনৈতিক দল আনুষ্ঠানিকভাৱে ঘোষণা কৰি ছিকিমৰ ৰাজনৈতিক ক্ষেত্ৰখনত বৃহৎ জোকাৰনিৰ সৃষ্টি কৰে। ভুটীয়াৰ দলটোৰ নাম হ’ল ‘হামৰো ছিকিম’। ৰাজনৈতিক বিশ্লেষকে ইয়াক ৰাজ্যখনৰ ৰাজনীতিত এটা গুৰুত্বপূৰ্ণ অগ্ৰগতি বুলি জ্ঞান কৰা দেখা গৈছে।
উল্লেখযোগ্য যে ভুটীয়াই আজিৰ পৰা প্ৰায় দুমাহ পূৰ্বে তেওঁৰ পূৰ্বৰ দল তৃণমূল কংগ্ৰেছ ত্যাগ কৰিছিল। তৃণমূল কংগ্ৰেছত থকাৰ সময়ত প্ৰাক্তন ফুটবলাৰজন পশ্চিম বংগৰ ৰাজনীতিত সক্ৰিয় আছিল। তেওঁ ২০১৪ চনত দাৰ্জিলিং লোকসভা সমষ্টি আৰু ২০১৬ চনত শিলিগুৰি বিধানসভা সমষ্টিৰ পৰা তৃণমূল কংগ্ৰেছৰ টিকটত প্ৰতিদ্বন্দ্বিতা কৰিছিল যদিও সফলতাৰ মুখ দেখা নাছিল।
প্ৰায় দুমাহৰ পূৰ্বে ভুটীয়াই ঘোষণা কৰিছিল যে তেওঁ ছিকিমৰ ৰাজনীতিত খোজ পেলাব আৰু তেতিয়াই তেওঁ এটা নতুন ৰাজনৈতিক দল খোলাৰ ইংগিত দিছিল।
“মোৰ একমাত্ৰ মনোযাগ হ’ল ছিকিমৰ বিকাশৰ ওপৰত। মোৰ ৰাজনীতিত যোগদানে ছিকিমৰ লগতে দেশৰ বাকী অংশৰো যুৱচামক উৎসাহিত কৰিব। আজিৰ তাৰিখত ৰাজনৈতিক নেতাই প্ৰস্তুত কৰা নীতিৰ দ্বাৰাই সকলো নিৰ্ণয় হয়। তেওঁলোকক সমালোচনা কৰা সহজ, কিন্তু ভাল মানুহবোৰ আগ বাঢ়ি আহি ৰাজনীতিৰ লেতেৰাবোৰ চাফা কৰাটো গুৰুত্বপূৰ্ণ।” ভুটীয়াই নতুন দিল্লীত দিয়া সংবাদমেলত এইদৰে কয়।
তেওঁ লগতে কয় যে ফুটবলৰ জৰিয়তে নিজৰ ভাবমূৰ্তি নিৰ্মাণ কৰিবলৈ তেওঁক ২০ বছৰৰ সময় দৰকাৰ হৈছিল আৰু এইটো ৰাজনীতিৰ বাবে অথলে যাবলৈ দিব নোৱাৰে। “মোক ফুটবলৰ জৰিয়তে নাম কৰিবলৈ ২০ বছৰ সময় লাগিছিল। মই জনসাধাৰণক প্ৰতিশ্ৰুতি দিছো যে মই এইটো ৰাজনীতিৰ নামত নষ্ট হ’বলৈ দিব নোৱাৰো।” ভুটীয়াই কয়।
আনহাতে তৃণমূল কংগ্ৰেছত থকাৰ সময়ত উপযুক্ত গুৰুত্ব নোপোৱা বুলি কৈ কয় যে পশ্চিম বংগৰ ৰাজনীতিৰ অংশো হোৱাৰ লগতে বেংগলৰ শীৰ্ষস্থানীয় ক্লাবত বহু বছৰ ধৰি খেলাৰ পিছতো তেওঁৰ গাৰ পৰা ‘বহিৰাগত’ৰ মাৰ্কা যোৱা নাছিল। সেয়ে এতিয়া তেওঁ নিজৰ শিপাৰ ওচৰলৈ গুচি আহিছে।
“মোক তৃণমূল কংগ্ৰেছৰ শীৰ্ষস্থানৰ পৰা অৱনমিত কৰা হৈছিল। এইটো পাহৰিব নোৱাৰি যে শিলিগুৰিৰ পৰা যেতিয়া মই প্ৰতিদ্বন্দ্বিতা কৰিছিলো, তেতিয়াও মোৰ পিঠিত বহিৰাগতৰ ছাপ আছিল। মই বেংগলত বহু বছৰ ধৰি খেলিছিলো। কিন্তু বহিৰাগত ছাপটো সদায়ে লাগি আছিল।” এইদৰে কয় দেশৰ অসময়ৰ জনপ্ৰিয় ফুটবলাৰজনে।
“এতিয়া মই ঘূৰি আহিছো। মোৰ পৰিয়াল, মোৰ ঘৰ সকলো ছিকিমত আছে। মই এই গৃহভূমিৰ সন্তান। মই নিজকে সংকল্পবদ্ধ কৰিবলৈ সমৰ্থ হ’ম। মই ভাবো ইয়াত মই অধিক বৰঙনি দিব পাৰিম।” এইদৰে কয় তেওঁ।
আনহাতে গোৰ্খালেণ্ড বিষয়টোত মত দি তেওঁ কয় যে তেওঁ গোৰ্খালেণ্ড বিষয়টোত তৃণমূল কংগ্ৰেছৰ স্থিতিৰ সৈতে একমত নহয়।
