শনিবাৰৰ পৰা ৰাজ্যৰ এন আৰ চি উন্নিতকৰণৰ প্ৰথম পৰ্য্যায়ৰ বংশবৃক্ষ পৰীক্ষণৰ কাম আৰম্ভ হৈছে। এন আৰ চিৰ ৰাজ্যিক সমন্বয়ক প্ৰতীক হাজেলাই আজি কয় যে ৰাজ্যৰ ৪৭ লাখ লোকৰ বংশবৃক্ষ আৰু তেওঁলোকে দাখিল কৰা লিগেচি ডাটাত ব্যাপক বিসংগতিয়ে দেখা দিছে আৰু ইয়াৰ পুনৰীক্ষণৰ কাম শনিবাৰৰ পৰা আৰম্ভ হৈছে।
এন আৰ চিৰ ৰাজ্যিক সমন্বয়ক প্ৰতীক হাজেলাই ৰাজ্যৰ ৪৭ লাখ লোকে দাখিল কৰা লিগেচি ডাটা আৰু তেওঁলোকৰ নথি-পত্ৰত ব্যাপক খেলিমেলি থকা বুলি উল্লেখ কৰে। তেওঁ লগতে কয় যে যিসকল লোকৰ লিগেচি দাতা বিসংগতিপূৰ্ণ বুলি ধৰা পৰিছে তেওঁলোকলৈ জাননী প্ৰেৰণ কৰা হৈছে তেওঁলোকে ইয়াৰ পুনঃনিৰীক্ষণৰ বাবে এন আৰ চি কেন্দ্ৰলৈ আহিব লাগিব।
হাজেলাই জনায় যে একেটা লিগেচি ডাটা বিভিন্ন লোকে ব্যৱহাৰ কৰা দেখা গৈছে আৰু সেইবোৰ সঠিকভাৱে পুনৰীক্ষণ কৰাৰ প্ৰয়োজন আছে। এইক্ষেত্ৰত বহুলোকে অন্য পৰিয়ালৰ লিগেচি ডাটা ব্যৱহাৰ কৰিব পাৰে। এতিয়া বংশবৃক্ষ ভালদৰে পৰীক্ষা কৰিব লগিব যাতে অন্যলোকে ভুৱা তথ্যৰ ব্যৱহাৰ কৰি নাম অন্তৰ্ভুক্ত কৰিলে সেইবোৰ বিচাৰি উলিয়াব পাৰি।
যিসকল লোকে জাননী লাভ কৰিছে তেওঁলোকে এন আৰ চিৰ বাবে ব্যৱহাৰ কৰা লিগেচি ডাটাৰ প্ৰকৃত প্ৰামাণিক তথ্য দাঙি ধৰিব লাগিব। জাননী লাভ কৰা লোকজনে তেওঁ ব্যৱহাৰ কৰা লিগেচি ডাটাৰ মূল ব্যক্তিজনৰ লগত তেজৰ সম্পৰ্ক থকা দুজন লোকক লগত লৈ আহিব লাগিব।
হাজেলাই লগতে কয় যে যিসকল লোকৰ নাম ইতিমধ্যে প্ৰকাশিত এন আৰ চিৰ তালিকাভুক্ত হৈছে তেওঁলোকলৈও এই প্ৰক্ৰিয়াটোত জাননী জাৰি কৰা হ’ব পাৰে যদিও কোনোৱে চিন্তা কৰিবলগীয়া নাই। এন আৰ চিৰ বিষয়াসকলে পুনৰীক্ষণ প্ৰক্ৰিয়াৰ বাবে যি কৰিবলগীয়া থাকে সেয়া কৰিব আৰু লোকসকলে কোনো প্ৰ-পত্ৰ পূৰণ কৰিব নালাগে বা কোনো সমস্যাৰ সন্মুখীন হ’বলগীয়া নাই।
প্ৰায় ৪০ দিন ধৰা চলিবলগীয়া এই পুনৰীক্ষণৰ গোটেই প্ৰক্ৰিয়াৰ বাবে ২৫০০ টা এন আৰ চি কাৰ্যালয়ৰ লগতে ২৭০০ বিষয়া নিযুক্ত কৰা হৈছে।