অসমত বহু মূল্যবান গছ এতিয়া বিলুপ্তপ্ৰায় হ’বলৈ ধৰিছে। এনে ধৰণৰ বিলুপ্ত হ’বলৈ ধৰা থলুৱা গছসমূহ সংৰক্ষণৰ ওপৰত গুৰুত্ব প্ৰদান কৰা হৈছে উত্তৰ অসমত। এই মন্তব্য উত্তৰ অসমৰ বন বিভাগৰ আয়ুক্ত পি শিৱকুমাৰৰ। কালি বিশ্বনাথ চাৰিআলি প্ৰেছ ক্লাৱত আয়োজিত এক অনুষ্ঠানত অংশ গ্ৰহণ কৰি বন বিষয়া গৰাকীয়ে এইদৰে কয়।
প্ৰকৃতিবিদ সৌৰভ কুমাৰ বৰকটকীয়ে আঁত ধৰা অনুষ্ঠানত বন বিষয়া কুমাৰে বিশ্বনাথ জিলাৰ বিহালি সংৰক্ষিত বনাঞ্চলক অসমৰ এক অমূল্য আৰু প্ৰচুৰ সম্ভাৱনা পূৰ্ণ বনাঞ্চল বুলি অভিহিত কৰাৰ লগতে একক প্ৰচেষ্টাৰে বোলা গছ আৰু আন মূল্যবান বহু গছপুলিৰ নাৰ্ছাৰী তৈয়াৰ কৰি সংৰক্ষণৰ পৰিকল্পনাৰ কথাও উল্লেখ কৰে।
অনুষ্ঠানত অংশগ্ৰহণ কৰি পূব শোণিতপুৰৰ নৱ নিযুক্ত বন সংমণ্ডল প্ৰাধিকাৰী সুভাষ কডমে বিশ্বনাথক সেউজীয়া বিশ্বনাথ হিচাপে গঢ় দিয়াৰ প্ৰচেষ্টা হাতত ল’ব বুলি মন্ত্যব কৰি কয় যে বিহালিৰ হাতিদিপুকে ধৰি পৰ্যটনৰ আকৰ্ষণীয় স্থান বোৰ নতুন ৰূপত গঢ় দিয়া, পৰিত্যক্ত ভূমিত পুনৰ বৃক্ষ ৰোপণ কৰা আদিত তেওঁ গুৰুত্ব দিব।
এই অনুষ্ঠানত বিশ্বনাথৰ সাংবাদিক সকলক একোটাকৈ মেহৰগণি গছৰ পুলি বিতৰণ কৰা হয়। অনুষ্ঠানৰ আৰম্ভণিতে সাংবাদিক পুলক হাজৰিকা, আমিৰ খান, কাজি জেইদুল ইছলাম, জগতাৰ সিং, জয়ন্ত বৰুৱা আদিয়ে অতিথি সকলক আদৰণি জনায়।
প্ৰেছ ক্লাৱৰ সম্পদক বসন্ত বৰাই উদ্দেশ্য বাখ্যা কৰা অনুষ্ঠানত জ্যেষ্ঠ সাংবাদিক নিৰঞ্জন হাজৰিকা, দিব্যজ্যোতি নাথ, অৰূপ কাকতি, ভাস্কৰ জ্যোতি বৰা, ভাস্কৰ বৰা আদিয়ে অংশ লয়।
অনুষ্ঠানৰ পিছত সাংবাদিকসকলে বিশ্বনাথৰ ভিন্ন প্ৰান্তত বৃক্ষ ৰোপণ কাৰ্য্যসূচীৰে ৰাইজৰ মাজত সজাগতা সৃষ্টিৰ প্ৰয়াস কৰে |