বোকাখাত নগৰক ৰাজ্যৰ ভিতৰতে এখন স্বচ্ছ আৰু সুন্দৰ নগৰ হিচাপে পৰিগণিত কৰিবৰ বাবে নুমলীগড় শোধনাগাৰৰ সহযোগত বোকাখাতৰ মহকুমা প্ৰশাসনে বুধবাৰৰ পৰা পষেক জোৰা এক চাফাই অভিযান কাৰ্যসূচী আৰম্ভ কৰে৷
এই উপলক্ষে বুধবাৰৰ পুৱা নগৰখনৰ নাট্যমন্দিৰৰ সমীপত আয়োজিত এক বিশেষ অনুষ্ঠানত বোকাখাতৰ চাফাই কৰ্মী, জ্যেষ্ঠ নাগৰিক, সংবাদ কৰ্মী আৰু স্থানীয় লোকৰ উপৰি বোকাখাতৰ মহকুমাধিপতি বিবেক শ্যাম, নিৰ্বাচনী বিষয়া জিমলী শইকীয়া কাকতি, ৰাজহ চক্ৰ বিষয়া খনিন্দ্ৰ দাস, মহকুমা দণ্ডাধীশ শান্তনু গগৈ, আৰক্ষী বিষয়া ৰূপজ্যোতি দত্তৰ লগতে নুমলীগড় শোধনাগাৰৰ জেষ্ঠ প্ৰৱন্ধক মিন্টু সন্দিকৈ উপস্থিত থাকে৷
অনুষ্ঠানত বোকাখাতৰ সমুহ চাফাই কৰ্মীক নুমলীগড় শোধনাগাৰৰ তৰফৰ পৰা টি চাৰ্ট, মাস্ক, হাতমোজা, পাচি, কোৰ আৰু বেলচাৰ লগতে বিভিন্ন চাফাই সামগ্ৰী প্ৰদান কৰে৷
‘আমি বোকাখাতক এখন পৰিস্কাৰ নগৰী হিচাপে গঢ়ি তুলিবৰ বাবে আজিৰ পৰা পোন্ধৰ দিনৰ এক বিশেষ চাফাই অভিযান আৰম্ভ কৰিছো’ বুলি মন্তব্য কৰে নৱ নিযুক্ত মহকুমাধিপতি বিবেক শ্যামে।
ইয়াৰ উপৰি শোধানাগাৰটোৰ জ্যেষ্ঠ প্ৰৱন্ধক মিণ্টু সন্দিকৈয়ে কয়, ‘বোকাখাত নগৰক পৰিস্কাৰ হিচাপে গঢ়ি তুলিবৰ বাবে নুমলীগড় শোধনাগাৰ দায়বদ্ধ৷ ইয়াৰ বাবে চাফাই অভিযানেই নহয় বোকাখাতৰ আৱৰ্জনা নিষ্কাষণ প্ৰকল্পৰ লগতে সৌন্দৰ্য বৰ্দ্ধনৰ বিভিন্ন আঁচনিও আমি হাতত লৈছো”।
মহকুমা তথ্য আৰু জন সম্পৰ্কৰক্ষী বিষয়া মামুন বৰকটকীয়ে আঁত ধৰা অনুষ্ঠানৰ শেষত চাফাই কৰ্মীৰ লগত ঝাৰু মাৰি চাফাই অভিযানৰ শুভাৰম্ভ কৰে মহকুমাধিপতি বিবেক শ্যাম আৰু শোধনাগাৰৰ জ্যেষ্ঠ প্ৰৱন্ধক মিন্টু সন্দিকৈয়ে৷
উল্লেখ্য যে বিশ্ব ঐতিহ্য ক্ষেত্ৰ কাজিৰঙাৰ গাতে লাগি থকা বোকাখাতক এখন পৰ্যটক নগৰী হিচাপে গঢ়ি তোলাৰ বাবে বোকাথাতৰ জনসাধাৰণে দীৰ্ঘদিনৰ পৰা দাবী জনায় আহিছে৷ এই ক্ষেত্ৰত পৰ্যটকক আকৰ্ষণ কৰিব পৰাকৈ নগৰখনৰ সৌন্দৰ্য বৰ্ধনৰ বাবে মহকুমা প্ৰশাসনে লোৱা পদক্ষেপক ৰাইজে প্ৰশংসা কৰিছে৷
