বৰ্ধিত বিদ্যুৎ মাচুল, প্ৰি-পেইড মিটাৰৰ প্ৰতিবাদত আৰু অত্যাধিক লোড শ্বেডিঙৰ বিৰুদ্ধে আম আদমি পাৰ্টীয়ে কৰিবলগীয়া প্ৰতিবাদলৈ নাগৰিক সমাজ, দল-সংগঠনক সমৰ্থন জনাবলৈ আহ্বান আপ অসমৰ সভাপতি ডা৹ ভবেন চৌধুৰীৰ। উল্লেখ্য যে ১৩ জুন, মঙলবাৰে আম আদমি পাৰ্টীয়ে সমগ্ৰ অসমতে সমষ্টিয়ে সমষ্টিয়ে প্ৰতিবাদী কাৰ্যসূচী হাতত লৈছে।
উক্ত প্ৰতিবাদী কাৰ্যসূচীলৈ সকলো নাগৰিক সমাজ আৰু দল-সংগঠনৰ সমৰ্থন বিচাৰিছে ডা৹ ভবেন চৌধুৰী ডাঙৰীয়াই। লগতে উক্ত প্ৰতিবাদী কাৰ্যসূচীত সকলোকে অংশ গ্ৰহণ কৰিবলৈও তেওঁ আহ্বান জনায়।
প্ৰায় প্ৰতি মাহে বিদ্যুৎ মাচুল ৩০ৰ পৰা ৭০ পইচা পৰ্যন্ত চৰকাৰে বৃদ্ধি কৰি আছে। ইয়াৰ বিপৰীতে বিজুলী যোগান ধৰিব পৰা নাই এ পি ডি চি এলে। তদুপৰি প্ৰি-পেইড মিটাৰৰ নামত অতিৰিক্ত বৃহৎ পৰিমাণৰ মাচুল ভৰিবলগীয়া হৈছে গ্ৰাহকে।
আগত যদি এটা পৰিয়ালৰ মাহে বিদ্যুৎ মাচুল ২০০০ টকা আহিছিল, এতিয়া প্ৰি-পেইড মিটাৰ সংযোগ কৰাৰ পাছত সেই পৰিয়ালটোৰ দিনে ৩০০ৰ পৰা ৪০০ টকাৰ মাচুল আগতীয়াকৈ দিবলগীয়া হৈছে। অৰ্থাৎ পৰিয়ালটোৱে প্ৰি-পেইড মিটাৰ সংযোগ কৰাৰ পাছত মাহে ১০ হাজাৰ পৰ্যন্ত মাচুল ভৰিবলগীয়া হৈছে।
এনে প্ৰেক্ষাপটত আম আদমি পাৰ্টীয়ে এ পি ডি চি এলৰ এনে হঠকাৰী সিদ্ধান্তৰ বিৰুদ্ধে তীব্ৰ প্ৰতিবাদ সাব্যস্ত কৰিব।
