উত্তৰ পূৰ্বাঞ্চলৰ অস্থিৰ মণিপুৰৰ দুদিনীয়া ভ্ৰমণসূচী সামৰি আজি ৰাজ্যখন এৰিছে সেনা বাহিনীৰ মুৰব্বী জেনেৰেল বিপিন ৰাৱতে। সেনা বাহিনীৰ এক প্ৰেছ বিবৃতি অনুসৰি ২৮ আৰু ২৯ ডিচেম্বৰত সেনা বাহিনীৰ মুৰব্বীজনে অসম ৰাইফলচৰ ইনস্পেক্টৰ জেনেৰেল (দক্ষিণ) ৰ কাৰ্যালয় ভ্ৰমণ কৰে। উক্ত ভ্ৰমণৰ সময়ত সেনাৰ মুৰব্বীজনক সংগ দিয়ে সেনা বাহিনীৰ ইষ্টাৰ্ন কমাণ্ডৰ মুৰব্বী লেফটেনেণ্ট জেনেৰেল অভয় কৃষ্ণা আৰু স্পিয়েৰ্চ কৰ্পচৰ লেফটেনেণ্ট জেনেৰেল অনিল চৌহানে। জেনেৰেল ৰাৱতৰ সন্মুখত ৰাজ্যখনৰ বৰ্তমানৰ নিৰাপত্তা ব্যৱস্থা সন্দৰ্ভত সংক্ষিপ্তষাৰ দাঙি ধৰে অসম ৰাইফলচ (দক্ষিণ)ৰ ইনস্পেক্টৰ জেনেৰেল মেজৰ জেনেৰেল বিৰেন্দ্ৰ আৰু ৫৭ নং মাউণ্টেইন ডিভিজনৰ মেজৰ জেনেৰেল উ সুৰেশ কুমাৰে। বিবৃতিটোত লগতে কোৱা হৈছে যে সেনা বাহিনীৰ মুৰব্বীজনে অভিযানগত প্ৰস্তুতিৰ বুজ লৈ নিৰাপত্তা বাহিনী সমূহৰ প্ৰচেষ্টাৰ প্ৰশংসা কৰে। তেওঁ ৰাজ্যখনৰ শান্তি আৰু সুস্থিৰতা নিশ্চিত কৰাৰ বাবে সেনা জোৱান সকলে চলোৱা প্ৰচেষ্টাৰ শলাগ লয় আৰু তেওঁলোকক পেছাদাৰিত্ব বজাই ৰাখি ভাৰতীয় সেনাৰ প্ৰকৃত উদ্যমেৰে তেওঁলোকৰ কাম-কাজ কৰি যোৱাৰ বাবে আহ্বান জনায়।
