কাণত হে’ডফ’ন লগাই অসাৱধানভাৱে যোৱাটোৱেই কাল হ’ল ত্ৰিপুৰাৰ এজন যুৱকৰ।
কাণত হে’ডফ’ন লগাই বদৰপুৰ ৰে’ল ক্ৰছিঙৰ ওচৰত ৰে’লপথ পাৰ হওঁতেই ২২ বছৰীয়া তাপস পাল নামৰ যুৱকজনক শিলচৰ মহিশাসন এক্সপ্ৰে’ছে ৰে’লখনে কাটি দুটুকুৰা কৰে। ঘটনাৰ প্ৰত্যক্ষদৰ্শীয়ে জনোৱা মতে আজি ২৮ এপ্ৰিলৰ দিনৰ ১০ মান বজাত ঘটনাটো ঘটে।
জানিব পৰা মতে মৃত তাপস পাল বদৰপুৰৰ সমীপত চলি থকা বৰাক নৈ খননৰ শ্ৰমিক আছিল।
সমগ্ৰ দেশৰ লগতে অসমতো দৈনিক অসংখ্য পথ দুৰ্ঘটনাত বহুলোকে প্ৰাণ হেৰুৱাব লগা হোৱাৰ সময়তে হে’ডফ’নো শেহতীয়াকৈ বহু দুৰ্ঘটনাৰ কাৰক হৈ পৰা দেখা গৈছে।
শেহতীয়াকৈ উত্তৰ প্ৰদেশত ১৩ গৰাকী কণমাণি ছাত্ৰ-ছাত্ৰীয়ে প্ৰাণ হেৰুওৱা ঘটনাটোও কাণত হে’ডফ’ন লগোৱা চালকে ৰে’লপথ পাৰ হওঁতেই সংঘটিত হৈছিল।
ভাৰতত প্ৰতি বছৰে ডেৰ লাখ গৰাকী লোকে পথ দুৰ্ঘটনাত প্ৰাণ হেৰুৱাব লগা হয়।
ভাৰতত পথ দুৰ্ঘটনাৰ ২০১৬ বৰ্ষৰ প্ৰতিবেদন মতে দেশত প্ৰতি বছৰে ৪ লাখটাতকৈও অধিক পথ দুৰ্ঘটনা ঘটে।
