কংগ্ৰেছৰ অধিকাংশ মুচলমান বিধায়কেই বাংলাদেশী মূলৰ বুলি ৰাজিক্য বিজেপিৰ মুখপাত্ৰ মমিনুল আৱালে বিতৰ্কিত মন্তব্যৰ তীব্ৰ প্ৰতিক্ৰিয়া কৰিছে প্ৰদেশ কংগ্ৰেছে। প্ৰদেশ কংগ্ৰেছে এই সন্দৰ্ভত কয় যে কংগ্ৰেছ দলৰ কোনো বিধায়কেই বাংলাদেশী মূলৰ নহয়। মমিনুল আৱালৰ ইতিহাসৰ সম্যক জ্ঞান নাই বাবেই এনে আজৱ মন্তব্য কৰিছে।
“বাংলাদেশৰ জন্ম হৈছিল ১৯৭১ চনত। তাৰ বহু দশক পূৰ্বে অসমলৈ প্ৰব্ৰজন কৰা তথা অসমৰ সমাজ জীৱনৰ লগত বিলীন হোৱা বৃহত্তৰ অসমীয়া জাতিৰ অন্যতম অংগস্বৰূপ মুছলমান সম্প্ৰদায়ৰ কংগ্ৰেছত থকা বিধায়কসকলক বাংলাদেশী মূলৰ বুলি কৈ মমিনুল আৱালে অসমৰ সমগ্ৰ মুছলমানক অপমান কৰিছে।” এইদৰে কোৱা হয় প্ৰদেশ কংগ্ৰেছৰ প্ৰেছ বিজ্ঞপ্তিটোত।
ইয়াৰ লগতে প্ৰদেশ কংগ্ৰেছে কয় যে এনে মন্তব্যৰ বাবে মমিনুল আৱালে ক্ষমা খুজিব লাগিব। তাৰোপৰি তেওঁ কোন মূলৰ মুছলমান সেয়াও ৰাজহুৱা কৰিবলৈ প্ৰত্যাহ্বান জনাইছে প্ৰদেশ কংগ্ৰেছে। বিজ্ঞপ্তিটোত কোৱা হৈছে যে বিজেপি চৰকাৰৰ বিফলতা, প্ৰতাৰণা ঢাকিবলৈ মমিনুল আৱালে চালে-বেৰে কোবোৱা কথাৰে ৰাইজৰ দৃষ্টি আকৰ্ষণ কৰিব বিচাৰিছে।
“কোন কি মূলৰ ব্যক্তি সেই বিষয়ত বিজেপিৰ দলৰ মুখপাত্ৰই চাৰ্টিফিকেট দিব নালাগে। মমিনুল আৱাল কোন মূলীয় মুছলমান প্ৰথমে সেই কথা ৰাজহুৱা কৰক।” এইদৰে কোৱা হয় বিবৃতিটোত।
আনহাতে মমিনুল আৱালৰ এই বিতৰ্কিত মন্তব্য তথা ভিত্তিহীন অভিযোগক তীব্ৰ প্ৰত্যাহ্বান জনাইছে নগাঁও জিলাৰ ৰূপহীহাট বিধানসভা সমষ্টিৰ কংগ্ৰেছী বিধায়ক নুৰুল হুদাই। তেওঁ ২৩ এপ্ৰিলত নগাঁও জিলা কংগ্ৰেছৰ কাৰ্যালয়ত এখন সংবাদমেল দি কয় যে তেওঁ মমিনুলে ভাৰত তথা অসমৰ ইতিহাস নাজানে। আৱালে যদি ক্ষমা নিবিচাৰে ১৫ জন বিধায়কে আইনৰ আশ্ৰয় লোৱা হ’ব বুলিও তেওঁ ব্যক্ত কৰে।
