মহানগৰীৰ বশিষ্ঠ চাৰিআলিত শনিবাৰে নিশা ১২:৩০ মান বজাত সংঘটিত এক পথ দুৰ্ঘটনাত দুজন লোক গুৰুতৰভাৱে আহত হয়।
বশিষ্ঠ আৰক্ষীয়ে জানিবলৈ দিয়া মতে কালি নিশা এইছ আৰ ৫৫ এন ১৭৯৩ নম্বৰৰ এখন মালবাহী ট্ৰাকৰ বাঁওফালৰ চকা পাম্পচাৰ হৈ নিয়ন্ত্ৰণ হেৰুওৱাৰ ফলত পিছফালৰ পৰা অহা এখন স্কুটীয়ে ট্ৰাকখনত খুন্দিয়ায়। স্কুটীখনৰ নম্বৰ এ এছ ০১ডি এল ৭০২৪ বুলি আৰক্ষী সূত্ৰই জনায়।
দুৰ্ঘটনাৰ ফলত আহত লোকদুজন সম্বন্ধত পিতা-পুত্ৰ বুলি জানিব পৰা গৈছে। তেওঁলোকক ক্ৰমে উমা শংকৰ প্ৰসাদ (পিতৃ) আৰু আকাশ কুমাৰ প্ৰসাদ (পুত্ৰ) বুলি আৰক্ষীয়ে জনায়।
আনহাতে ঘটনাটো সংঘটিত হোৱাৰ পিছতেই ট্ৰাকচালক দুজনে ঘটনাস্থলীৰ পৰা পলায়ন কৰে বুলি আৰক্ষীয়ে আমাক জনায়।
দুৰ্ঘটনাটোত পতিত স্কুটী আৰোহী দুজনক ততাতৈয়াকৈ মহানগৰীৰ এজাইল হাস্পতালত ভৰ্তি কৰোৱা হয়। তোওঁলোকৰ আঘাত বৰ বেছি গুৰুতৰ নহয় বুলি বশিষ্ঠ আৰক্ষীয়ে জানিবলৈ দিয়ে।