তিনিচুকীয়া জিলাৰ অন্তৰ্গত মাৰ্ঘেৰিটা মহকুমাৰ চহৰৰ মাজেদি পাৰ হৈ যোৱা ৩৮ নং ৰাষ্ট্ৰীয় ঘাইপথৰ জৰাজীৰ্ণ অৱস্থাই জনসাধাৰণক জলা-কলা খুৱাইছে। দীৰ্ঘদিন ধৰি মাৰ্ঘেৰিটা ব্লক তিনি আলি, চেগুণবাৰী তিনিআলি, বৰগোলাই, লিডু, টিৰাপ কলিয়ৰি আদি অঞ্চলেৰে পাৰ হৈ যোৱা ৩৮ ৰাষ্ট্ৰীয় ঘাইপথ সম্পূৰ্ণ বিধ্বস্ত হৈ পৰিছে।
সাধাৰণ পথচাৰীৰ পৰা আৰম্ভ কৰি ৰোগী, স্কুলীয়া ছাত্ৰ-ছাত্ৰী, দুচকীয়-তিনিচকীয়া বাহনত যাতায়ত কৰা যাত্ৰী সকলে প্ৰতিদিনে যথেষ্ট দুৰ্ভোগৰ সন্মুখীন হ’বলগীয়া হৈছে। বিশেষকৈ ব্লক তিনিআলি, বৰগোলাই আৰু টিৰাপ কলিয়ৰি এলেকাত ৰাষ্ট্ৰীয় ঘাইপথত কেৱল আছে প্ৰকাণ্ড প্ৰকাণ্ড কেইবাটাও গাত।
মাৰ্ঘেৰিটা মহকুমাৰ অতি ব্যস্ত অঞ্চল ব্লক তিনিআলিৰ পথ অতিক্ৰম কৰিয়ে মাৰ্ঘেৰিটা অসামৰিক চিকিৎসালয়, মহকুমাধিপতিৰ কাৰ্য্যালয়, চক্ৰ বিষয়াৰ কাৰ্য্যালয়, মহকুমা ন্যায়িক দণ্ডাধীশৰ আদালত, খণ্ড উন্নয়ন কাৰ্য্যালয়, শিক্ষাখণ্ড কাৰ্য্যালয়, মাৰ্ঘেৰিটা মহাবিদ্যালয়ৰ লগতে কেইবাখনো বিদ্যালয়লৈ যাব লাগে।
বৃহত্তৰ মাৰ্ঘেৰিটা মহকুমাৰ নগৰ তথা গ্ৰামাঞ্চলৰ লোক সকলে প্ৰতিদিনে বিভিন্ন কামৰ বাবে এই পথৰে যাতায়ত কৰাৰ সময়ত যমৰ-যাতনা ভোগ কৰিব লগা এক পৰিবেশৰ সৃষ্টি হৈছে। ৰাইজক সাময়িক সকাহ দিয়াৰ বাবে স্থানীয় বিধায়ক ভাস্কৰ শৰ্মাই কেইবাবাৰো দ গাত হোৱা স্থানত বালি মাটি মিশ্ৰিত শিল দিয়াৰ ব্যৱস্থা কৰিছিল যদিও একো উন্নত হোৱা নাই। গুৰুত্বপূৰ্ণ কথা যে স্থানীয় ক্ৰেচাৰ বোৰৰ পৰা লোৱা এই বালি মাটি মিশ্ৰিত শিল অতি নিম্নমানদণ্ডৰ ( শিল বালিতকৈ বোকা মাটি বেছি )হোৱা বাবে পথৰ অৱস্থাৰ অধিক অৱনতিহে ঘটিল।
ইতিমধ্যে সংবাদ মাধ্যমত বহুবাৰ এই বাতৰি প্ৰকাশ পাইছে। বিভিন্ন দল সংগঠনে ৰাষ্ট্ৰীয় পথটি নতুনকৈ নিৰ্মাণ কৰাৰ দাবীত আন্দোলনৰ কাৰ্যসূচীও সাব্যস্ত কৰিছে। দীৰ্ঘদিন ধৰি আছু, অসম জাতীয়তাবাদী যুৱ-ছাত্ৰ পৰিষদ, ছাত্ৰ মুক্তি সংগ্ৰাম সমিতি আদি দল সংগঠনে কেতবোৰ প্ৰতিবাদী কাৰ্য্যসূচী ৰূপায়ণ কৰি আহিছে যদিও চৰকাৰ প্ৰশাসনে চকু মুদা কুলিৰ ভাও ধৰাৰ গুৰুতৰ অভিযোগ উত্থাপন হৈছে।
পৰিবৰ্তনৰ শ্লোগানেৰে শাসনৰ গাদীত বহা বিজেপি নেতৃত্বাধীন চৰকাৰখনে বিগত দুবছৰে অসমৰ বাট পথ সমূহ নিৰ্মাণ কৰাৰ ক্ষেত্ৰত চূড়ান্তভাৱে ব্যৰ্থ হোৱাৰ অভিযোগ উঠিছে। অনতিপলমে মাৰ্ঘেৰিটাৰ লগতে অসমৰ আন আন অঞ্চলৰ ৰাষ্ট্ৰীয় ঘাইপথ সমূহ নিৰ্মাণ কৰিবলৈ দাবী জনাইছে ছাত্ৰ মুক্তি সংগ্ৰাম সমিতি তিনিচুকীয়া জিলা সমিতি, অসম জাতীয়তাবাদী যুৱ ছাত্ৰ পৰিষদ মাৰ্ঘেৰিটা সমিতি, সদৌ অসম ছাত্ৰ সন্থাৰ মাৰ্ঘেৰিটা আঞ্চলিক সমিতি আদি দল সংগঠনে। অন্যথা ভগ্নপ্ৰায় ৰাষ্ট্ৰীয় ঘাই পথসমূহ নিৰ্মাণৰ দাবীত তীব্ৰ গণতান্ত্ৰিক আন্দোলন গঢ়ি তুলিব বুলি হুংকাৰ দিছে সংগঠনসমূহে।
উল্লেখ্য যে মাৰ্ঘেৰিটাৰ এই পথেদিয়ে অসম চৰকাৰ তথা ভাৰত চৰকাৰে বৃহৎ পৰিমাণৰ ৰাজহ সুদীৰ্ঘ বছৰে লাভ কৰি অহাৰ পাছতো কি কাৰণত এই পথটোৰ নিৰ্মাণৰ দায়িত্ব গ্ৰহণ কৰা নাই সেইয়া অতি ৰহস্যৰ বিষয় হিচাপে চিহ্নিত হৈছে।
