সোমবাৰে অনুষ্ঠিত হৈ যোৱা মেঘালয়ৰ আমপাতি বিধানসভা সমষ্টিৰ উপ নিৰ্বাচনত ৰাজ্যখনৰ অভিলেখ সংখ্যক ৯০.৫৫ শতাংশ ভোটাৰ ৰাইজে ভোটদান সাব্যস্ত কৰে। সোমবাৰে সন্ধিয়া ৰাজ্যখনৰ মুখ্য নিৰ্বাচনী বিষয়া এফ আৰ খাৰকংগ’ৰে এখন সংবাদমেলৰ আয়োজন কৰি এই কথা জানিবলৈ দিয়ে।
ৰাতিপুৱা ৭ বজাৰ পৰা কটকটীয়া নিৰাপত্তা বেষ্টনীৰ মাজৰে অনুষ্ঠিত হোৱা ভোটগ্ৰহণ কাৰ্যসূচী বিয়লি ৪ বজাত অন্ত পৰে।
উল্লেখ্য যে ৩৯ টা ভোটকেন্দ্ৰত সুকলমে অনুষ্ঠিত হৈ যোৱা বিধানসভা সমষ্টিটোৰ পৰা উপ নিৰ্বাচনটোত শাসনাধিস্থ নেশ্যনেল পিপলছ পাৰ্টীৰ ক্লিমেণ্ট জি মমিন, কংগ্ৰেছ দলৰ হৈ প্ৰাক্তন মুখ্য মন্ত্ৰী মুকুল চাংমাৰ জ্যেষ্ঠ জীয়ৰী মিয়ানি ডি শ্বিৰা আৰু নিৰ্দলীয় প্ৰাৰ্থীৰূপে শুভাংকৰ কোচে প্ৰাৰ্থিত্ব আগবঢ়াই।
জানিব পৰা মতে ৰাতিপুৱাৰে পৰা নিজৰ নিজৰ পছন্দৰ প্ৰাৰ্থীক ভোট দিবলৈ ভোটাৰসকলে প্ৰত্যেকটো ভোটকেন্দ্ৰতে ভিৰ কৰা পৰিলক্ষিত হৈছিল। তাৰোপৰি বিশেষভাৱে সক্ষম লোকসকলৰ বাবে প্ৰশাসনৰ তৰফৰ পৰা লোৱা হয় বিশেষ ব্যৱস্থা।
উল্লেখ্য যে ১৯৯৩ চনৰ পৰাই আমপাতি সমষ্টিক প্ৰতিনিধিত্ব কৰি অহা জ্যেষ্ঠ কংগ্ৰেছী নেতা মুকুল চাংমাই যোৱাটো বিধানসভা নিৰ্বাচনত চংছাক আৰু আমপাতিৰ পৰা প্ৰতিদ্বণ্ডিতা কৰি দুয়োটা সমষ্টিৰে পৰা জয়ী হৈছিল। সেয়ে চাংমাই এটা সমষ্টি এৰি দিবলগীয়া হোৱাত আমপাতি সমষ্টিটোৰ পৰা পদত্যাগ কৰে আৰু তেতিয়াৰে পৰা আমপাতি সমষ্টিটো খালী হৈ আছিল।
শান্তিপূৰ্ণ ভাৱে অনুষ্ঠিত হৈ যোৱা উক্ত নিৰ্বাচনটোক কেন্দ্ৰ কৰি সমষ্টিটোত চিআৰপিএফৰ চাৰিটাকৈ কোম্পানী আৰু ৰাজ্যৰ আৰক্ষী কৰ্মী নিয়োগ কৰা হৈছিল।
