ত্ৰিপুৰা আৰু বাংলাদেশৰ মাজৰ ৰে’ল সংযোগৰ কাম কাজ ক্ষীপ্ৰতাৰে চলি থকা সময়তে ত্ৰিপুৰা চৰকাৰে আন এখন বিদেশী ৰাষ্ট্ৰ ম্যানমাৰ আৰু ত্ৰিপুৰাৰ মাজত ৰে’ল সেৱা প্ৰৱৰ্তন কৰাৰ বাবে বিভাগীয় কৰ্তৃপক্ষক প্ৰস্তাৱ আগবঢ়ায়।
উল্লেখণীয় যে ত্ৰিপুৰা চৰকাৰে ত্ৰিপুৰাৰ পৰা কাষৰীয়া ৰাজ্য মিজোৰামৰ মাজেৰে প্ৰতিৱেশী ৰাষ্ট্ৰ ম্যানমাৰলৈ এটা ৰে’ল পথ নিৰ্মাণ কৰি দুয়োখন দেশৰ মাজত সংযোগ স্থাপনৰ বাবে প্ৰস্তাৱ আগবঢ়ায় কেন্দ্ৰীয় চৰকাৰক।
ত্ৰিপুৰাৰ ধলাই জিলাৰ জৱাহৰ নগৰৰ পৰা মিজোৰামৰ ডাৰলয়ানৰ মাজেৰে ম্যানমাৰৰ কলাইলৈ ৰে’ল চলাচল আৰম্ভ কৰি যোগাযোগ স্থাপনৰ বাবে ৰাজ্য চৰকাৰে প্ৰস্তাৱ আগবঢ়ায়।
ৰাজ্য চৰকাৰে আগবঢ়োৱা এই প্ৰস্তাৱ অনুসৰি ত্ৰিপুৰা আৰু ম্যানমাৰৰ মাজৰ এই পথছোৱাৰ দুৰত্ব হ’ব ২৫৭ কিলোমিটাৰ। আনহাতে ত্ৰিপুৰাৰ জৱাহৰ নগৰৰ পৰা মিজোৰামৰ ডাৰলয়ানলৈকে দূৰত্ব হৈছে মাত্ৰ ১০৯ কিলোমিটাৰ।
উল্লেখ্য যে ১০ এপ্ৰিলত আগৰতলাত অনুষ্ঠিত হোৱা নীতি আয়োগৰ বৈঠকতে ত্ৰিপুৰাৰ মুখ্য মন্ত্ৰী বিপ্লব কুমাৰ দেবে উক্ত ৰে’ল সম্প্ৰসাৰণৰ বিষয়টো উত্থাপন কৰিছিল।
এই প্ৰসংগত মুখ্য মন্ত্ৰী দেবে কয় যে যদিহে আমি আগবঢ়োৱা প্ৰস্তাৱটো কাৰ্যকৰী হয় তেনেহ’লে উত্তৰ-পূবৰ সৈতে ম্যানমাৰৰ মাজৰ সম্পৰ্ক ত্বৰাণ্বিত হোৱাৰ লগতে বেপাৰ-বাণিজ্যৰ ক্ষেত্ৰতো দুয়োখন দেশে অন্য দিশলৈ গতি কৰিব।
