শেহতীয়া গণনা অনুসৰি কাজিৰঙাত গড়ঁৰ সংখ্যা ২৪১৩

বিশ্বৰ ঐতিহ্য কাজিৰঙা ৰাষ্ট্ৰীয় উদ্যানত সম্পন্ন হৈ যোৱা ১৩ সংখ্যক গড়ঁ সমীক্ষাৰ ফলাফল শুকুৰবাৰে পুৱা আনুষ্ঠানিক ভাৱে ঘোষণা কৰা হয় ৷

বন বিভাগৰ প্ৰধান মুখ্য বন সংৰক্ষক নিৰঞ্জন কুমাৰ বাসুয়ে কৰা ঘোষণা মতে শেহতীয়া গণনাত ৰাষ্ট্ৰীয় উদ্যান খনত ২৪১৩ গঁড় পোৱা গৈছে ৷ ইয়াৰে ৬৪২ টা প্ৰাপ্ত বয়স্ক মতা,  ৭৯৩ জনী মাইকী, ২০৬ লিংগ নিৰূপণ কৰিব নোৱাৰা গঁড়,  ১১৬ টা ডেকেৰুৱা মতা, ১৪৯ জনী চেউৰী,  এই গোটৰে ১২২ টা লিংগ নিৰূপণ কৰিব নোৱাৰা গঁড়,  ১৫৫ টা এবছৰত কৈ সৰু পোৱালী আৰু ২৩০ টা এবছৰতকৈ ডাঙৰ পোৱালী পোৱা গৈছে ৷

মন কৰিব লগীয়া যে ২০১৫ চনৰ গণনাত কাজিৰঙাত পোৱা ২৪০১ গড়ঁৰ বিপৰীতে ‌২০১৮ চনৰ গণনাত মুঠ ১২ টা গঁড় বৃদ্ধি পাইছে ৷

জানিব পৰা মতে শেহতীয়া গণনাৰ আগতে কাজিৰঙাৰ ঘাহঁনি বোৰ ভালকৈ নজ্বলোৱাৰ বাবে শেহতীয়া গণনাত বহু গঁড় বাহিৰত থাকি যোৱাৰ সম্ভাৱনা আছে ৷

আনহাতে, গণনাৰ দুটা দিনতেই গণনাকাৰীয়ে ৪ টাকৈ মৃত গঁড় গণনাৰ সময়তে ৰাষ্ট্ৰীয় উদ্যানখনত প্ৰত্যক্ষ কৰে ৷

উল্লেখ্য যে এই গঁড় গণনা কাৰ্যসূচী প্ৰতি তিনিবছৰৰ অন্তৰালত অনুষ্ঠিত হয় আৰু পূৰ্বৰ ২০১৫ বৰ্ষত হোৱা গঁড় গণনা প্ৰক্ৰিয়াত কাজিৰঙা ৰাষ্ট্ৰীয় উদ্যানখনত ২,৪০১টা গঁড়ৰ অৱস্থিতি পোৱা গৈছিল।

৪২,৯৯৬ হেক্টৰে আৱৰা কাজিৰঙা ৰাষ্ট্ৰীয় উদ্যানখন হৈছে পৃথিৱীৰ একমাত্ৰ উদ্যান য’ত আটাইতকৈ বেছি এশিঙীয়া গঁড়ৰ অৱস্থিতি পোৱা যায়।