অসমৰ দল-সংগঠনবোৰৰ নেতাসকলৰ সম্পত্তিৰ তালিকাৰ লগতে আয়ৰ উৎস ৰাজহুৱা কৰাৰ দাবী তুলিলে অসম পাব্লিক ৱৰ্কছ নামৰ সংগঠনটোৰ সভাপতি অভিজিৎ শৰ্মাই। “চৰকাৰৰ ফালৰ পৰা নেতা বিলাকে যেনেদৰে সম্পত্তিৰ তালিকা দাখিল কৰে, তেনেকৈ ৰাজনৈতিক, অৰাজনৈতিক সংগঠনৰ সম্পত্তি আৰু আয়ৰ উৎস ৰাজহুৱা কৰিব লাগে। এজন নেতাৰ সংগঠন কেতিয়াও আয়ৰ উৎস হ’ব নোৱাৰে।”
আজি দিচপুৰ প্ৰেছ ক্লাবত নিজে আয়োজন কৰা মুখামুখি অনুষ্ঠানত এই দাবী জনাই এ পি ডব্লিউৰ সভাপতি অভিজিৎ শৰ্মাই।
এ পি ডব্লিউৰ সভাপতিজনে মত বিনিময় অনুষ্ঠানত কয়, “১৯৮৫ চনৰ আগৰ পৰাই আমি এটা কথা শুনি আহিছো যে আহ ঐ আহ ওলাই আহ, খেদ ঐ খেদ বিদেশীক খেদ, তেজ দিম তেল নিদিওঁ। তাৰ পিছত আহি পৰিল স্বাৱলম্বিতাৰ কথা, কিছুমানে মুচিৰ কাম কৰিলে। পিছত গৈ ফোটোকাৰ ফেন হ’ল তথা চান্দাৰ বহীহে পকেটত সোমাল নাইবা কোনো কোনো চৰকাৰৰ মন্ত্ৰী-বিধায়ক হৈ আছে।
ইয়াৰোপৰি তেওঁ ‘বিদেশী সমস্যাটো সমাধান কৰিবলৈ হ’লে বাংলাদেশীসকলক হাতে নামাৰি ভাতে মাৰিব লাগিব।‘ বুলি উল্লেখ কৰাৰ লগতে কয় “অসমীয়া মানুহ আগ বাঢ়ি আহিলে জাতিটো নিজেই বাচি যাব। অন্যথা বিদেশী খেদাৰ কথা কোৱাটো মূল্যহীন যেতিয়ালৈকে আমি বাংলাদেশীৰ সেৱা গ্ৰহণ কৰিবলৈ নেৰো।”
তদুপৰি জাতীয়তাবাদী দল-সংগঠনৰ লোকসকলে নাগৰিকত্ব সংশোধনী বিধেয়কৰ বিৰুদ্ধে আন্দোলন কৰাৰ বিৰোধিতা কৰাৰ উপৰি তেওঁ কয়, “নেতাসকলে নিজৰ লগতে আনক ঠগাই অসমৰ পৰা বিদেশী যাব লাগিব বুলি গল ফুলাই ফুলাই হুংকাৰ দি আছে, কিন্তু ৰাজ্য চৰকাৰৰ হাতত এই সম্পৰ্কে একো পলিচিয়েই নাই।”
তেওঁ কয় যে নাগৰিকত্ব সংশোধনী বিধেয়কৰ বিৰুদ্ধে আন্দোলন কৰাৰ পৰিৱৰ্তে গৃহীত হোৱাৰ পাছদিনাই উচ্চতম ন্যায়ালয়ত গোচৰ তৰিব এ পি ডব্লিউৱে।
নেতাজনে কয় যে ৰাতিপুৱা সময়খিনি ঘৰতে কাম কৰি ৯ বজাৰ পৰা ১২ বজালৈকে আন্দোলন কৰিব আকৌ পুনৰ কামত লাগি গ’লে অসমীয়াগিৰিটো চলাৰ লগতে অসমীয়াও বাচিব।
“আমি নাগৰিকত্ব সংশোধনী বিধেয়কৰ বিৰুদ্ধে হোৱা আন্দোলনত নাই, যি আন্দোলনৰ ফল একো নোলায়।” এইবুলি বিভ্ৰান্তিকৰ মন্তব্য কৰে শৰ্মাই।
তেওঁ কয় “নাগৰিকত্ব সংশোধনী বিধেয়কখন গৃহীত হোৱাৰ পিছদিনাখনেই আসাম পাব্লিক ৱৰ্কাৰ্চৰ ফালৰ পৰা উচ্চতম ন্যায়ালয়ত কেছ ফাইল কৰা হ’ব। আমাৰ বিশ্বাস আইনী প্ৰক্ৰিয়াৰে এই বিল আমি খাৰিজ কৰিব পাৰিম।”
