অহা ৩০ জুনত প্ৰকাশ পাবলগীয়া এন আৰ চিৰ খচৰা প্ৰকাশ পোৱাৰ সম্ভাৱনা ক্ষীণ। এন আৰ চিৰ ৰাজ্যিক সমন্বয়ক প্ৰতীক হাজেলাই দিয়া ইংগিত অনুসৰি ৩০ জুনত এন আৰ চিৰ খচৰা প্ৰকাশ হোৱাৰ কোনে সম্ভাৱনা নাই।
সংবাদ মাধ্যমক হাজেলাই দিয়া ইংগিত অনুসৰি বিষয়াসকলে প্ৰচেষ্টা অব্যাহত ৰাখিছে যদিও এন আৰ চিৰ কাম সম্পূৰ্ণ হৈ উঠাৰ সম্ভাৱনা ক্ষীণ। বৰাক উপত্যকাৰ তিনিখন জিলাৰ বানৰ বাবে প্ৰায় এসপ্তাহৰো অধিক সময় ধৰি সম্পূৰ্ণ খচচৰা প্ৰকাশৰ কাম বাধাগ্ৰস্ত হোৱাৰ পৰিপ্ৰেক্ষিতত নিৰ্দ্ধাৰিত সময়ত এন আৰ চিৰ খচৰা প্ৰকাশ কৰাত জটিলতা আহি পৰিছে।
আনহাতে, বৰাক উপত্যকাক বাদ দি ৰাজ্যৰ বাকী অংশৰ এন আৰ চিৰ খচৰা প্ৰকাশ হোৱাৰ সম্ভাৱনাও ৰাজ্যিক সমন্বয়গৰাকীয়ে নুই কৰিছে। তেওঁ ব্যক্ত কৰা মতে সমগ্ৰ অসমতে একে সময়তে এন আৰ চিৰ সম্পূৰ্ণ খচৰা প্ৰকাশ পাব।
এন আৰ চিৰ সম্পূৰ্ণ খচৰা প্ৰকাশৰ সম্পৰ্কত শেহতীয়াকৈ উচ্চতম ন্যায়ালয়ত দাখিল কৰা শপতনামাৰ অহা ২ জুলাইত পৰৱৰ্তী শুনানি আছে।
ৰাজ্যিক সমন্বয়ক প্ৰতীক হাজেলাই দাঙি ধৰা ইংগিত মতে আৰু পাঁচটা দিন বাকী থকা অৱস্থাত এন আৰ চিৰ সম্পূৰ্ণ খচৰা প্ৰকাশ পোৱাৰ সম্ভাৱনা নাই।