ভাৰতত নিয়োজিত বাংলাদেশী উচ্চায়ুক্ত ছয়িদ মুৱাজ্জিম আলীয়ে কৈছে যে ৰাষ্ট্ৰীয় নাগৰিকপঞ্জী উন্নীতকৰণ বিষয়টো এটা দ্বিপাক্ষিক আলোচনাৰ বিষয়বস্তু নহয়, বৰং ই ভাৰতৰ এটা অভ্যন্তৰীণ বিষয়।
এখন স্থানীয় (কলকাতা) হোটেলত অনুষ্ঠিত ‘এখন ন্যূনতম বিকশিত দেশৰ পৰা বাংলাদেশৰ উত্তৰণ’ বিষয়ৰ এখন আলোচনাত অংশগ্ৰহণ কৰা বাংলাদেশী উচ্চায়ুক্তগৰাকীয়ে সাংবাদিকৰ প্ৰশ্নৰ উত্তৰত এইদৰে কয়। তেওঁ কয় যে ভাৰতে বাংলাদেশৰ সন্মুখত এই বিষয়ৰ ওপৰত কোনো প্ৰশ্নৰ অৱতাৰণা কৰা নাই।
অসমৰ পৰা অবৈধ নাগৰিকক বাংলাদেশলৈ ঘূৰাই পঠোৱাৰ সম্ভৱনা সম্পৰ্কে সাংবাদিকে সোধা এটা প্ৰশ্নৰ উত্তৰত আলীয়ে কয়, ‘‘মই ভাৰতত বাংলাদেশক প্ৰতিনিধিত্ব কৰোঁ, আৰু মই এই বিষয়টো সম্পৰ্কে আপোনালোকৰ সংবাদপত্ৰত পঢ়িছোঁ। কিন্তু দিল্লীয়ে এই বিষয়টো আমাৰ ওচৰত উত্থাপন কৰা নাই, গতিকে আমাৰ ইয়াত জড়িত হোৱাৰো কোনো সকাম নাই।’’
আৰু এটা প্ৰশ্ন আগবঢ়াই দিয়াৰ পাছত আলীয়ে সাংবাদিকক কয়, ‘‘ভাৰতে জানে যে ১৯৭১ৰ মুক্তিযুদ্ধৰ মূল্যবোধৰ ওপৰত প্ৰতিষ্ঠিত এখন সুস্থিৰ, শক্তিশালী আৰু বিকাশশীল বাংলাদেশে ইয়াৰ (ভাৰতৰ)নিজস্ব উত্তৰ-পূৰ্বাঞ্চলৰ নিৰাপত্তাৰ দিশটো নিশ্চিত কৰিব।’’
তেওঁ আৰু জোৰ দিয় কয় যে সন্ত্ৰাসবাদৰ বিৰুদ্ধে প্ৰধান মন্ত্ৰী শ্বেইখ হাছিনাৰ শক্তিশালী স্থিতি আৰু ভাৰতৰ নিৰাপত্তাৰ প্ৰতি ভাবুকি আনিব পৰা কোনো কাম-কাজৰ বাবে বাংলাদেশৰ ভূমি ব্যৱহাৰ কৰাটো ৰোধ কৰাৰ বাবে কৰি অহা প্ৰচেষ্টাক ভাৰত চৰকাৰে মূল্য দিছে।
তেওঁ কয় যে এয়া হৈছে এটা ‘গেম চেঞ্জাৰ’ আৰু ভাৰতে এইটো ভালদৰে জানে।এইটোৱেই একমাত্ৰ কাৰক যিটোৱে দুয়ো দেশৰ মাজত সম্পূৰ্ণ বিশ্বাসৰ সম্পৰ্ক সম্পৰ্ক স্থাপন কৰিছে।
তেওঁ আৰু কয়, যে ভাৰতক দেশখনৰ লুকইষ্ট (Look East) নীতি কৃতকাৰ্য হোৱাত সহায় কৰাৰ সিদ্ধান্তত বাংলাদেশ অটল, কাৰণ ইয়াত ভাৰতৰ উত্তৰ-পূৰ্বাঞ্চলক বাংলাদেশৰ মাজেৰে সংযোগ স্থাপন কৰাটো হৈছে প্ৰধান বিষয়।
‘‘ইয়াত দুয়োখন দেশেই লাভান্বিত হ’ব। আমি আমাৰ অৰ্থনৈতিক বিকাশৰ বাবে প্ৰয়োজনীয় শক্তিৰ বাবে ভাৰতৰ বিদ্যুতৰ ওপৰত নিৰ্ভৰশীল, ভাৰতে দেশখনৰ উত্তৰ-পূৰ্বাঞ্চলৰ বিকাশৰ বাবে আমাৰ ওপৰত নিৰ্ভৰশীল।
বাংলাদেশৰ বিস্ময়কৰ বিকাশৰ কাহিনীয়ে ভাৰতত আৰু বিশেষকৈ দেশখনৰ (বাংলাদেশৰ) সীমান্তত অৱস্থিত ভাৰতৰ উত্তৰ-পূৰ্বাঞ্চলীয় ৰাজ্যসমূহত বিস্তাৰ কৰা ব্যাপক প্ৰভাৱৰ প্ৰসংগও টানি আনে।
‘‘আমেৰিকাৰ ক্ষেত্ৰত চীনৰ পাছতে কানাডা আৰু মেক্সিকো হৈছে দ্বিতীয় আৰু তৃতীয় বৃহৎ বাণিজ্য অংশীদাৰ। গতিকে বিশ্বৰ ১১খন দ্ৰুত অৰ্থনৈতিকভাৱে বিকাশশীল ৰাষ্ট্ৰ বাংলাদেশ ভাৰতৰ আগশাৰীৰ বাণিজ্যিক অংশীদাৰ দেশসমূহৰ এখন হ’ব নোৱাৰিব কিয়?’’ বাংলাদেশৰ বিশেষ প্ৰতিনিধিগৰাকীয়ে যুক্তি দৰ্শায়।
আলীয়ে জোৰ দি কয় যে বাংলাদেশ অৰ্থনৈতিক বিকাশ আৰু মানৱ বিকাশৰ ক্ষেত্ৰত মনোযোগী আৰু এটা সৰ্বাত্মক বিকাশৰ আদৰ্শক আগবঢ়াই নিয়াৰ বাবে দেশখনে অমৰ্ত্য সেনৰ দৰে অতি বিশিষ্ট অৰ্থনীতিবিদৰ পৰা প্ৰশংসা লাভ কৰিবলৈ সক্ষম হৈছে।
তেওঁ কৈছে, ‘‘আমি দেশ বিভাজনৰ টালি-টোপোলা এৰি থৈ আহি আৰু মুক্তিযুদ্ধৰ গৌৰৱময় উদ্যমেৰে ভাৰতৰ সৈতে যুক্ত হৈ একেলগে বিকাশ লাভ কৰিব বিচাৰোঁ। তেওঁ আৰু কয় যে আলোচনাৰ মাজেৰে বিবাদমান বিষয়সমূহ বাচি উলিয়াব পাৰি।
উল্লেখ্য যে আলীৰ ভাষণৰ পূৰ্বে এগৰাকী তৃণমূল কংগ্ৰেছৰ মন্ত্ৰীয়ে কৈছিল যে বাংলাদেশৰ পৰৱৰ্তী নিৰ্বাচনত শ্বেইখ হাছিনাই জয়লাভ কৰিব।
পশ্চিম বংগৰ গ্ৰাহক পৰিক্ৰমা বিভাগৰ মন্ত্ৰী সাধন পাণ্ডেই কৈছিল, ‘‘শ্বেইখ হাছিনা হৈছে এগৰাকী মহান নেত্ৰী। এনে কোনো আঞ্চলিক সমস্যা নাই, যি তেখেত আৰু আমাৰ নেত্ৰী মমতা বেনাৰ্জীয়ে সমাধান কৰিব নোৱাৰে।’’
উল্লেখ্য যে বাংলাদেশৰ সৈতে তিস্তাৰ জল বিনিময় বিষয়টো সমাধানৰ ক্ষেত্ৰত মমতা বেনাৰ্জী এটা প্ৰতিবন্ধক হিচাপে ঠিয় দি আছে।
