বিটিচি দখল কৰিম বুলি সততে দম্ভালি মাৰি থকা কোকৰঝাৰৰ লোকসভাৰ সমষ্টিৰ সাংসদ নৱ কুমাৰ শৰণীয়াৰ দল গণ সুৰক্ষা পাৰ্টি নিচিহ্ন হৈ পৰিব নেকি?
এই প্ৰশ্নই এতিয়া জোকাৰি গৈছে বিটিচিৰ ৰাজনীতিত। উল্লেখ্য বিগত বিটিচি নিৰ্বাচনত বিটিচি দখল কৰিম বুলি দম্ভালি মাৰি থকা নৱ কুমাৰ শৰণীয়া গণ সুৰক্ষা পাৰ্টিয়ে মাত্ৰ এখন আসনত জয়ী হৈ য়ুপিপিএল নেতৃত্বাধীন বিটিচিত চামিল হ’বলৈ বাধ্য হৈছিল।
বিটিচি নিৰ্বাচনৰ ফলাফল আনুষ্ঠানিকভাৱে ঘোষণা হোৱাৰ পূৰ্বে চৰম সুবিধাবাদীৰ পৰিচয় দি য়ুপিপিএল আৰু বিজেপি দলৰ শৰণাপন্ন হৈছিল নৱ কুমাৰ শৰণীয়াই।
ইয়াৰ পিছতে য়ুপিপিএল-বিজেপি বিটিচি পৰিষদলৈ সমৰ্থন আগবঢ়াইছিল নৱ কুমাৰ শৰণীয়াৰ গণ সুৰক্ষা পাৰ্টিৰ বিজয়ী একমাত্ৰ পাৰিষদগৰাকীয়ে।
কিন্তু ইয়াৰ পিছতে নৱ কুমাৰ শৰণীয়াৰ গণ সুৰক্ষা পাৰ্টি যেন নিচিহ্ন হোৱাৰ দিশে আগবাঢ়িছে।
বুধবাৰে গণ সুৰক্ষা পাৰ্টিৰ বৃহৎসংখ্যক নেতা-কৰ্মীয়ে য়ুপিপিএলত আনুষ্ঠানিকভাৱে যোগদান কৰিছে।
বুধবাৰে বিটিচি তথা য়ুপিপিএলৰ প্ৰধান প্ৰমোদ বড়োৰ উপস্থিতিত বিগত বিটিচি নিৰ্বাচনত গণ সুৰক্ষা পাৰ্টিৰ পৰা নিৰ্বাচনত অৱতীৰ্ণ হোৱা ১০ গৰাকী নেতাই য়ুপিপিএলত যোগদান কৰিছে।
যুপিপিএলৰ কোকৰঝাৰস্থিত প্ৰধান কাৰ্যালয়ৰ যোগদান কাৰ্যসূচীত যোগদান কৰা গণ সুৰক্ষা পাৰ্টিৰ নেতাসকল হ’ল ক্ৰমে বিগত নিৰ্বাচনৰ চৰাইবিলৰ গণ সুৰক্ষা পাৰ্টিৰ প্ৰাৰ্থী ধজেন্দ্ৰ ৰাভা, জ’মদুৱাৰৰ প্ৰাৰ্থী পংকজ দাস, কচুগাঁৱৰ প্ৰাৰ্থী ৰণেন্দ্ৰ কোচ, বাখুনগুৰিৰ থানেশ্বৰ ৰাভা, শালাকাটিৰ সঞ্জয় শৰণীয়া, শ্ৰীৰামুপুৰৰ হাফিজুৰ ৰহমান, গুমাৰ প্ৰাৰ্থী মফিদুল আহমেদ, খৈৰাবাৰীৰ অৰুণ বড়ো, নাগ্ৰীজুলিৰ ডেনিয়েল মাৰ্ডী আৰু পাঁচনৈৰ চেৰফাঙৰ প্ৰাৰ্থী ৰবীন মুৰ্মু।
কেৱল এইসকল নেতাই নহয়, গণ সুৰক্ষা পাৰ্টিৰ এই নেতাসকলৰ সৈতে দলটোৰ আন বহু নেতা আৰু কৰ্মীও আজি য়ুপিপিএলত যোগদান কৰিছে।
ইফালে গণ সুৰক্ষা পাৰ্টিৰ বৃহৎ সংখ্যক নেতা-কৰ্মীয়ে য়ুপিপিএল যোগদান কৰাৰ পিছতে প্ৰমোদ বড়োৰ নেতৃত্বাধীন দলটোৱে ২০২১ৰ বিধানসভা নিৰ্বাচনৰ বাবে শক্তি পূৰ্বতকৈ বৃদ্ধি পোৱা বুলি দাবী কৰিছে।
যোগদান কাৰ্যসূচীৰ পিছতে সাংবাদিকৰ আগত বিটিচি তথা য়ুপিপিএল প্ৰধান প্ৰমোদ বড়োৱে কয় “জিএছপি নেতা আৰু অন্যান্য দলৰ নেতাসকলে য়ুপিপিএলত যোগদান কৰি শুদ্ধ সিদ্ধান্ত গ্ৰহণ কৰিছে। আৰু আমি আগন্তুক বিধানসভাৰ নিৰ্বাচনৰ বাবে সাজু আছো।”
“কোকৰাঝাৰ আৰু চিৰাঙত আমাৰ দলটো শক্তিশালী হ’বলৈ আৰু কাম কৰাৰ প্ৰয়োজন আছে।” প্ৰমোদ বড়োৱে লগতে কয়।
