এগৰাকী মহিলাৰ প্ৰাণ ৰক্ষা কৰিলে কংগ্ৰেছ বিধায়কে। শৰীৰত ১০ কিলোগ্ৰাম ওজনৰ টিউমাৰে থিতাপি লৈছিল এগৰাকী মহিলাৰ শৰীৰত। সেই টিউমাৰ অস্ত্ৰোপচাৰ কৰি উলিয়ালে এগৰাকী কংগ্ৰেছ বিধায়কে।
খবৰ অনুসৰি তেলেংগানাৰ অনিতা নামৰ এগৰাকী মহিলাই দীৰ্ঘদিনে পেটত এটুকুৱা ডাঙৰ টিউমাৰৰ লৈ যন্ত্ৰণাদায়ক জীৱন যাপন কৰি আছিল। দিনক দিনে শাৰীৰিক অৱস্থাৰ অৱনতি ঘটিছিল মহিলাগৰাকীৰ।
তেলেংগানা কংগ্ৰেছৰ বিধায়ক চিক্কুডু বামশী কৃষ্ণই মহিলাগৰাকীৰ শৰীৰত জটিল অস্ত্ৰোপচাৰ কৰে। তেওঁৰ নেতৃত্বত থকা চিকিৎসা দলটোৱে অস্ত্ৰোপচাৰত সফলতা অৰ্জন কৰে। জীৱন ৰক্ষা কৰাৰ বাবে বিধায়কগৰাকীক ধন্যবাদ জ্ঞাপন কৰে মহিলাগৰাকীয়ে।
মহিলাগৰাকীক টিউমাৰৰ সমস্যাত ভৰ্তি কৰোৱা হৈছিল তেলেংগানাৰ আচোম্পেট চৰকাৰী চিকিৎসালয়ত। তাতে কৰ্তব্যৰত আছিল বিধায়ক চিক্কুডু। কংগ্ৰেছত যোগদান কৰি সক্ৰিয় ৰাজনীতিৰ লগতে তেওঁ চিকিৎসা বৃত্তি এৰি যোৱা নাছিল। মহিলাগৰাকীৰ অৱস্থাৰ কথা শুনি তেওঁ চিকিৎসালয়খনৰ আন চিকিৎসকৰ সৈতে এক বিশেষ দল গঠন কৰে আৰু মহিলাগৰাকীৰ পেটৰ অস্ত্ৰোপচাৰ কৰাৰ সিদ্ধান্ত লয়।
বিধায়ক চিক্কুডুয়ে সমগ্ৰ ঘটনাটো নিজৰ ফেচবুকত শ্বেয়াৰ কৰে। তাত তেওঁ কয় যে মহিলাগৰাকী যোৱা এবছৰ ধৰি টিউমাৰৰ সমস্যাত ভুগি আছিল। তৎক্ষণাত অস্ত্ৰোপচাৰৰ প্ৰয়োজন হৈছিল।
পেটৰ পৰা টিউমাৰটো কাটি লোৱাৰ পিছত দেখা গ’ল যে ইয়াৰ ওজন প্ৰায় ১০ কিলোগ্ৰাম। বিধায়কগৰাকীয়ে কয় যে অস্ত্ৰোপচাৰৰ পিছত ৰোগীজনৰ অৱস্থা ভাল হৈছে। সফল অস্ত্ৰোপচাৰৰ বাবে ৰোগীজনৰ লগতে তেওঁৰ দলটোক ধন্যবাদ জ্ঞাপন কৰে পৰিয়ালৰ লোকে।
