অহা ৮ মে’ত পুৱা ৫ বজাৰ পৰা ১২ ঘন্টীয়া ‘অসম বন্ধ’ৰ ঘোষণা কৰিছে অসম মুছলিম স্বায়ত্ব শাসিত পৰিষদ দাবী সমিতি (সুৰক্ষা সমিতি)য়ে। ‘বিশ্বনাথ কাণ্ড’, বিধায়ক প্ৰশান্ত ফুকনৰ শেহতীয়া মন্তব্য আৰু শিলাদিত্য দেবে বিভিন্ন সময়ত কৰি অহা মুছলমান বিৰোধী বক্তব্যৰ প্ৰতিবাদত সংগঠনটোৱে এই বন্ধ ঘোষণা কৰিছে।
তাৎপৰ্যপূৰ্ণ যে গুৱাহাটী উচ্চ ন্যায়ালয়ে ‘বন্ধ’ৰ ওপৰত নিষেধাজ্ঞা আৰোপ কৰাৰ পিছতো সংগঠনটোৱে এইদৰে ‘অসম বন্ধ’ ঘোষণা কৰিছে। যোৱা মাৰ্চ মাহত ‘বন্ধ’ক নিষিদ্ধ কৰি গুৱাহাটী উচ্চ ন্যায়ালয়ে এক গুৰুত্বপূৰ্ণ ৰায় প্ৰদান কৰিছিল।
আজি দিছপুৰ প্ৰেছ ক্লাৱত সংবাদমেল অনুষ্ঠিত কৰি প্ৰাক্তন বিধায়ক তথা সংগঠনটোৰ সভাপতি ৰচুল হক বাহাদুৰে কয়, ‘বিজেপি চৰকাৰে বিধায়ক শিলাদিত্য দেবক নিয়ন্ত্ৰণ কৰিবলৈ কোনো চেষ্টা নকৰিলে। যাৰ বাবে বিশ্বনাথ কাণ্ডৰ দৰে ঘটনা ৰাজ্যত ঘটিবলৈ পালে। আমি ভাবো এই ঘটনাৰ লগত আৰ এছ এছ, বিজেপিৰ লোক জড়িত আছে।’
আনহাতে অহা ২৩ মে’ত লোকসভা নিৰ্বাচনৰ ফলাফল ঘোষণা হ’লে যদি বিজেপিৰ ফলাফল বেয়া হয় তেতিয়া দলটো মুছলমান সমাজৰ প্ৰতি অধিক আক্ৰমনাত্মক হৈ পৰিব পাৰে বুলি সন্দেহ প্ৰকাশ কৰে সংগঠনটোৰ সভাপতি গৰাকীয়ে।
প্ৰশান্ত ফুকনৰ শেহতীয়া মন্তব্যই ইয়াৰ ইংগিত দিছে বুলি উল্লেখ কৰি এই ক্ষেত্ৰত চৰকাৰে যাতে গুৰুত্ব দিয়ে তাৰ বাবেই এই বন্ধ ঘোষণা কৰা বুলি তেওঁ কয়।
